Նիկոլ Փաշինյանը՝ Կարագանդայի դեպքերի մասին

Այսօր չենք քննարկել Կառավարության հավանական կազմը. խմբակցության կանոնադրությունը և դրա հետ կապված հարցեր էին քննարկվում: Այս մասին ԱԺ «Իմ քայլը» խմբակցության նիստից հետո լրագրողների հետ զրույցում ասաց վարչապետի պաշտոնակատար Նիկոլ Փաշինյանը: Անդրադառնալով Ղազախստանի Կարագանդա քաղաքում հայերի և ադրբեջանցիների միջև տեղի ունեցած մահվան ելքով բախման միջադեպին, Նիկոլ Փաշինյանը նախ ցավակցություն հայտնեց զոհվածի հարազատներին, այնուհետև շեշտեց, որ այստեղ չի կարող լինել ազգամիջյան որևէ կոնտեքստ։ «Ուզում եմ ընդգծել, որ այդտեղ չի կարող լինել ազգամիջյան որևէ կոնտեքստ, որովհետև որքան ինձ են զեկուցել, կոնֆլիկտ ունեցած երկու խմբերն ազգային առումով միատարր չեն եղել, և դանակահարող խմբի մեջ ազգությամբ ղազախ քաղաքացի է եղել»,- ասաց նա և նշեց, որ տարբեր վարկածներ և լուրեր են դրվում շրջանառության մեջ: