Վերին Լարսում խցանումներ են, տասնյակ հայեր չեն կարողանում հատել անցակետը
Վերին Լարսում խցանումներ են, մի քանի տասնյակ հայեր չեն կարողանում հատել անցակետը։ Այս մասին Tert.am-ին տեղեկացրեց Տրանսպորտի, կապի և տեղեկատվական տեխնոլոգիաների փոխնախարար Արմեն Փամբուխչյանը։ Նրա խոսքով՝ խնդիրն արդեն 2 օր է՝ առկա է։ «Վրաստանի հատվածներից մեկում ձնահոսքի վտանգ կա, սա է պատճառը, որ վրացական կողմը մեքենաների մուտքը տևական ժամանակ փակել էր։ Սակայն շատ քիչ քանակությամբ մարդատար մեքենաներին բաց են թողել մինչև վտանգն անցնի, քանի որ կարող են ողբերգական հետևանքներ լինել»,- ասաց Փամբուխչյանը։ Փոխնախարարի խոսքով՝ ինքը խոսել է Վրաստանում Հայաստանի դեսպան Ռուբեն Սադոյանի հետ, որն իր հերթին կապ է հաստատել վրացական իշխանության հետ։ «Տեղումներն արդեն իսկ դադարել են, մեզ հավաստիացրել են, որ աշխատանքներ տարվում են ու կշարունակեն տարվել»,- շարունակեց Արմեն Փամբուխչյանը։
Հետևեք մեզ Viber-ում
