Մոսկվան հերթով «ականներ» է պայթեցնում

Օրերս Ռուսաստանի արտգործնախարար Սերգեյ Լավրովի՝ «Комсомольская правда» ռադիոկայանին տված հարցազրույցի մի հատված՝ բուռն քննարկումների թեմա դարձավ: Հայաստանի տարածքում տեղակայված կենսաբանական լաբորատորիաները, ինչպես երևում է Ռուսաստանի հանգիստ չեն տալիս: Նրանք պահանջել էին ցույց տալ լաբորիատորիաները, նրանց պահանջը բավարարվել էր, այժմ, ըստ ամենայնի, այլ պահանջներ ունեն... Մոսկվան և Երևանն ավարտում են փաստաթղթի նախապատրաստումը, որը երաշխավորելու է Հայաստանում օտարերկրյա զինծառայողների բացակայությունը, ասել էր Սերգեյ Լավրովը. «Հայաստանի հետ համատեղ ավարտում ենք փաստաթղթի պատրաստման գործընթացը, որը երաշխավորելու է, որ այդ երկրում օտարերկրյա ուժեր չեն լինելու և այն ամենն, ինչ այնտեղ արվում է, լինելու է թափանցիկ՝ որևէ սպառնալիքի կամ ռիսկերի բացակայության երաշխավորության տեսանկյունից»: Թեմային անդրադարձավ նաև Հայաստանում ՌԴ դեսպան Սերգեյ Կոպիրկինն՝ ասելով» «Որքանով տեղյակ եմ, հայկական ու ռուսական կողմեր միջև երկխոսություն է գնում կենսաբանական լաբորատորիաների շուրջ։ Այս հարցը մեզ անհանգստացնում է։ Հայկական կողի հետ երկխոսությունը բավականին կոնստրուկտիվ է, կա փոխըմբռնում։ Որևէ արգելքի մասին խոսք գնալ չի կարող»։ Սրան հաջորդեց պաշտոնական Երևանից միանգամից մի քանի հայտարարություն: Ռուս գործընկերները Նիկոլ Փաշինյանի կառավարության հետ երբեք չեն քննարկել ՀՀ տարածքում տեղակայված կենսաբանական լաբորատորիաներում օտարերկրյա զինծառայողների տեղակայման արգելքի վերաբերյալ որևէ փաստաթուղթ, նախօրերին Դիլիջանում լրագրողների հետ ճեպազրույցում ասաց վարչապետը։ «Նման ինչ-որ պայմանագիր նախկինում քննարկվել է Հայաստանի իշխանությունների հետ, մեր կառավարության օրոք մենք երբեք Ռուսաստանի գործընկերների հետ այդպեսի հարց չենք քննարկել», նշել է Նիկոլ Փաշինյանը։ ՀՀ ԱԳՆ-ն՝ ի դեմս ՀՀ ԱԳՆ մամուլի քարտուղար Աննա Նաղդալյանի՝ նշել է. «Ստիպված եմ ևս մեկ անգամ կրկնել, որ խոսքը գնում է Հայաստանի սանիտարահամարաճարակային վերահսկողության բարձրացումն ապահովող լաբորատորիաների մասին, որտեղ աշխատում են բացառապես հայ մասնագետներ: Հայաստանի պարագայում այստեղ ռազմական ներկայության մասին խոսք չկա»։ ՀՀ ԱԳՆ-ն կրկին հանդես եկավ պաշտոնական պարզաբանմամբ: Հայաստանը որևէ բանակցություն չի վարում մեր երկրի տարածքում երրորդ երկրի զինծառայողների տեղակայման հարցով. «Այս հարցով հստակ կարող եմ ասել, որ սանիտարահամաճարակային վերահսկողության ոլորտը հայ-ռուսական համագործակցության մի մաս է կազմում ու այդ հարցի շուրջ կա երկխոսություն: Ինչ վերաբերում է կենսաբանական լաբորատորիաներին, պետք է վերահաստատել, որ դրանք Հայաստանինն են, այնտեղ աշխատում են բացառապես հայ մասնագետներ ու դրանք ունեցել են, ունեն և կունենան բացառապես քաղաքացիական բնույթ», ասել էր Աննա Նաղդալյանը: Իսկ ճշգրտող հարցին՝ կա՞ քննարկում օտարերկրյա զինծառայողների հարցի շուրջ, ԱԳՆ մամուլի քարտուղարն արձագանքել էր. «Լաբորատորիաները քաղաքացիական բնույթ ունեն, Հայաստանի պարագայում ռազմական ներկայության խնդիր չկա, միաժամանակ պետք է ասեմ, որ Հայաստանը որևէ բանակցություն չի վարում մեր երկրի տարածքում երրորդ երկրի զինվորների տեղակայման հարցով»: Ըստ ամենայնի, Մոսկվան դժգոհ լինելով, որ պաշտոնական Երևանը ծավալվեց այս թեմայով, կրկին անդրադարձել է: ՌԴ ԱԳՆ մամլո խոսնակ Մարիա Զախարովան մեկնաբանել է արտգործնախարար Լավրովի հայտարարությունն այն մասին, որ Մոսկվան ու Երևանը պատրաստվում են հուշագիր ստորագրել՝ Հայաստանում օտարերկրյա զինվորականների ներկայությունը բացառելու վերաբերյալ: «Հասկանալով, որ ճշգրտում է անհրաժեշտ, մենք ներկայացրինք սղագրությունը՝ եզրերի անհրաժեշտ բոլոր մեկնաբանություններով,- ասել է նա: -Ուշադրություն դարձրեք սղագրությանը: Խոսքը ռազմական լաբորատորիաների մասին է: Ես շնորհակալ եմ լրատվամիջոցների այն ներկայացուցիչներին և Հայաստանի տեղեկատվական-լրատվական միջավայրին, որոնք անմիջապես զանգահարեցին և ճշտեցին՝ ինչի մասին է խոսքը, այլ չսկսեցին տարածել այն, ինչ հարցեր է առաջացնում: Շատ շնորհակալություն կատարված ճշգրտման համար»: Ամեն դեպքում, հարցը մնում է բաց՝ կա՞ նման փաստաթուղթ, թե՞ չկա: Եթե Հայաստանը, թեկուզ նախորդ իշխանության օրոք քննարկել է՝ այն պետք է հրապարակայնացնել: Ռուսաստանի ԱԳ նախարարի հայտարարությունից ամեն դեպքում, տպավորություն է, որ դա օրակարգային հարց է: Հիմա կամ Մոսկվան պատրաստվում է Փաշինյանի սեղանին նոր պահանջներ դնել, կամ հող է նախապատրաստում՝ նոր պայմաններ թելադրելու համար: Թամար Բագրատունի