Գիտե՞ք՝ ինչքան եմ երազել այս օրվա մասին.Արամ Սարգսյան

« Ընտրություններին եկել եմ շատ լավ տրամադրությամբ։ Գիտե՞ք՝ ինչքան եմ երազել այս օրվա մասին, որ մեր ժողովուրդն առանց խախտումների, առանց փող վերցնելու, առանց ճնշումների, հանգիստ, իր կամքով գա ընտրության։ Արդար ընտրությունները միշտ գերկարևոր եմ համարել Երկրում արդար ընտրություններ լինեն, մնացած ամեն ինչն իր տեղը կընկնի: Ես միշտ էլ այն կարծիքին եմ եղել, որ ելքը թե՛ դահլիճում է, թե՛ դրսում է: Լավ արդյունք տալու ելքը բոլորով մենք դառնալն է»,-   Արարատի մարզում քվերակություն կատարելուց հետո լրագրողների հետ զրույցում նշել է «Մենք» դաշինքի ցուցակը գլխավորող Արամ Սարգսյանը։ Սարգսյանը նշեց, որ միանշանակ քվեարկել է այսօրվա և ապագայի, ինչպես նաև անցյալի լավ հիշողությունները վառ պահելու և դրանք շարունակելու համար։ Արամ Սարգսյանի կարծիքով, սա իր մասնակցած բոլոր ընտրությունների քարոզարշավերից լավագույնն էր՝ քարոզարշավի մասնակցիների հավասար հնարավորությունների և այլ բոլոր առումներով։ «Միակ թերությունը, որից անընդհատ բողոքել եմ, կարճ ժամանակն էր։ Միգուցե դա մեզ համար նշանակություն ուներ, որովհետև մեր ուժը նոր ձևավորված դաշինք էր: Բայց մնացած առումներով, կարծում եմ, նրանց համար, ովքեր հանրությանն արդեն ծանոթ էին, խոչընդոտ չէր: Այդ թերությունը միայն մեզ էր վերաբերում»,- ասաց պատգամավորության թեկնածուն։ Լրագրողները հետաքրքրվեցին, թե Սարգսյանն անձամբ չարաշահումներ նկատե՞լ է քարոզարշավի ընթացքում, «քանի որ ՀՀԿ-ն քարոզարշավի ժամանակ բարձրաձայնում էր չարաշահումների մասին», Արամ պատասխանեց. «Գիտեք, ցանկացած մեկը կարող էր այդ մասին բարձրաձայնել, բացի Հանրապետականից։ Իրենք լավ կանեն՝ լռեն։ «Սիրուն չի»՝ կասեր իրենց կուսակցության ղեկավար Սերժ Սարգսյանը»։