ԱՄՆ-ում Էրդողանը կհանդիպի Ջո Բայդենին
ԱՄՆ փոխնախագահ Ջոզեֆ Բայդենը Վաշինգտոնում կհանդիպի Թուրքիայի նախագահ Ռեջեփ Թայիփ Էրդողանի հետ. վերջինը մասնակցելու է միջուկային անվտանգությանը նվիրված գագաթաժողովին: Փոխնախագահի աշխատակազմի տեղեկացմամբ, հանդիպումը նախանշված է մարտի 31-ին: Թուրքիայի նախագահն ավելի վաղ հայտարարել էր, որ ծրագրում է հանդիպել իր ամերիկացի պաշտոնակցին: Սպիտակ տան ներկայացուցիչը, սակայն, հաղորդել է, որ Բարաք Օբաման եւ Ռեջեփ Թայիփ Էրդողանը «հնարավորություն կունենա զրուցել գագաթաժողովի ժամանակ», այլ հանդիպում Օբամայի աշխատանքային գրաֆիկում չկա: Ըստ ՌԻԱ Նովոստիի, Էրդողանն ԱՄՆ-ում կլինի մինչեւ ապրիլի 2-ը: Նա կմասնակցի միջուկային անվտանգության հարցերին նվիրված գագաթաժողովին, որը կայանալու է Վաշինգտոնում, մարտի 31-ից մինչեւ ապրիլի 1-ը: Թուրքիայի նախագահը ծրագրում է ամերիկյան մայրաքաղաքում հանդիպել գործարար եւ ակադեմիական շրջանակների ներկայացուցիչների հետ: Այցի ընթացքում նա կհանդիպի նաեւ թուրքական եւ մահմեդական համայնքների ներկայացուցիչներին, Մերիլենդ նահանգում կմասնակցի թուրք-ամերիկյան մշակութային եւ քաղաքակրթության կենտրոնի բացման արարողությանը:
Հետևեք մեզ Viber-ում
