Եթե որևէ մեկը պիտի քվեարկի մեր օգտին աշխատանքից չազատվելու դիմաց, մեզ այդ քվեն անհրաժեշտ չէ. Ն. Փաշինյան
«Իմ քայլը» դաշինքի ընտրական ցուցակը գլխավորող Նիկոլ Փաշինյանը դեկտեմբերի 9-ին կայանալիք ԱԺ արտահերթ խորհրդարանական ընտրությունների նախընտրական քարոզարշավի շրջանակներում Կապանում հանդիպել է քաղաքացիներին: Ելույթի սկզբում վարչապետի պաշտոնակատարը հայտարարեց, որ Կապանն առանձնահատուկ տեղ է նոր Հայաստանում: «Կապանում տեղի ունեցած քաղաքապետի ընտրություններին իշխանության պաշտպանած թեկնածուն պարտվեց և հաղթեց անկախ թեկնածուն: Իշխանությունը խոնարհ ընդունեց ժողովրդի կամքը, և սա մեզ համար հպարտության առիթ է, և սա է հեղափոխությունը»,- ասաց Նիկոլ Փաշինյանը: Ինչպես հայտարարեց` անկախ նրանից` իրենք ընդդիմություն կլինեն, թե իշխանություն, ազատության մեջ կլինեն, թե անազատ, իրենց ոչինչ չի կարող կանգնեցնել Հայաստանը ազատ, հզոր երկիր դարձնելու ճանապարհին: «Մենք հորդորել ենք, որ մեր հանրահավաքներին մարդիկ պետք է չբերվեն: Մենք կառավարություն ենք, որ ժողովրդի ազատությունը որևէ կերպ չենք կարող սահմանափակել: Մեր կառավարությանը որևէ ապօրինի ծառայություն որևէ մեկից պետք չէ: Եթե որևէ մեկը «Իմ քայլը» դաշինքի օգտին պիտի քվեարկի նրա համար, որ աշխատանքից չազատվի, մեզ այդ քվեն անհրաժեշտ չէ: «Իմ քայլը» դաշինքը չի ուզում թեկուզ մեկ հարամ քվե: Մենք չենք եկել հին բռնապետությունը նոր բռնապետությամբ փոխարինելու»,- ասել է նա:
Հետևեք մեզ Viber-ում
