Փաշինյանի անդրադարձը հայ-ռուսական հարաբերություններին

Աբովյանում ընտրողների հետ հանդիպման ժամանակ «Իմ քայլը» դաշինքի առաջնորդ, վարչապետի պաշտոնակատար Նիկոլ Փաշինյանն անդրադարձավ հայ-ռուսական հարաբերություններին: «Մենք պետք է հետևողականորեն շարունակենք այս գիծը, բայց այդ բառակապակցությունը՝ ռազմավարական–դաշնակցային, ամեն օրվա և տարվա հետ պետք է ավելի ու ավելի շատ բան նշանակի։ Մենք չպետք է ուղղակի հույս ունենանք, որ այդ բառակապակցությունը մեր ցանկացած իմաստը կպահպանի ինքն իրենով, դա նույնպես աշխատանք է և մեր կառավարություն պատրաստ է այդ աշխատանքը կատարել, որովհետև մենք անհրաժեշտ ենք համարում այդ հարաբերություններին նոր՝ ավելի կարեւոր, իմաստ հաղորդել: Ողջունում եմ բոլոր այն հարթակները, որոնց նպատակը երկխոսություն ծավալելն է Հայաստանի ու Ռուսաստանի հանրային, քաղաքական, տնտեսական շրջանակների միջեւ»,– ասաց Նիկոլ Փաշինյանը։