Ես ներողություն եմ խնդրել Կարեն Ղազարյանի ընտանիքից. Փաշինյան
Ես ներողություն եմ խնդրել Կարեն Ղազարյանի ընտանիքից, որ մինչեւ հիմա մեր ջանքերն արդյունավետ չեն եղել: Այս մասին, այսօր՝ նոյեմբերի 28-ին, Իջեւան քաղաքի հրապարակում «Ազատություն» ռադիոկայանի հետ զրույցում նշեց վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը՝ անդրադառնալով Ադրբեջանում գերեվարված Կարեն Ղազարյանի ընատնիքի անդամների հետ հանդիպմանը: «Ակցիաներն իրենց իրավունքն են, ուղղակի իմ ակնկալիքն այն է, որ այդ ակցիաների բովանդակությունը համահունչ լինի նպատակներին: Որովհետեւ, եթե պատկերացրեք, մենք ամեն օր այդ ճանապարհը փակենք, դա Ադրբեջանը շահագրգիռ կլինի, որ չվերադարձնի, որ այդ ճանապարհը հաճախ փակվի: Այդ ճանապարհը Հայաստանի համար ռազմավարական նշանակություն ունի: Այսինքն ճանապարհը փակելով ոչ թե օգնում ենք, որ վերադառնա, այլ ընդհակառակը, նպաստում ենք, որ Ադրբեջանը շահագրգիռ լինի ավելի երկար նրան պահելու»:
Հետևեք մեզ Viber-ում
