Հաշվեհարդար ՀՀԿ-ում. Դժվարամարս անակնկալը. Ով ում հաշիվներն է մաքրելու
«Ժամանակ» թերթը գրում է. «Հանրապետական կուսակցությունը սկսելով իր քարոզարշավը՝ հայտարարել է, որ դեկտեմբերի 9-ի գիշերը Նիկոլ Փաշինյանին մեծ անակնկալ է սպասվելու: ՀՀԿ-ն, հավանաբար, նկատի ունի այն, որ տանելու է սպասվածից ավելի շատ ձայն: Ներկայումս քչերն են կարծում, թե ՀՀԿ-ին կհաջողվի հաղթահարել անցողիկ շեմը կամ լինել թեկուզ երրորդ ուժը, այսինքն՝ չհաղթահարողների մեջ էլ լավագույնը: Մյուս կողմից, սակայն, մենք պետք է նկատի առնենք այն, որ թավշյա հեղափոխության ձայների դիապազոնից դուրս մնացած փոքրաթիվ ձայները, այնուհանդերձ, բավականին անկանխատեսելիության միջավայրում են՝ հաշվի առնելով այն, որ այդ ձայների համար պայքարող ուժերի դիապազոնն էլ բավականին լայն է՝ ռադիկալ «Սասնա ծռերից» մինչեւ հանրությանն անանոթ նոր ուժեր՝ իրենց ամենատարբեր գաղափարներով, միաժամանակ հին ենթակառուցվածքներ տնօրինող ԲՀԿ ու նաեւ ՀՀԿ եւ այսպես ասած՝ ազատական դաշտում գործելու հավակնություն ներկայացնող միավորներ ու մեկ էլ մի ուժ՝ ՕԵԿ: Ահա այս բազմազանության պայմաններում, իհարկե, անկանխատեսելիությունը շոշափելիորեն մեծանում է, իսկ դա էլ իր հերթին ՀՀԿ-ին տալիս է «անակնկալի» հնարավորություն: Սա մի իրավիճակ է, որի հետ այլեւս ոչինչ անել հնարավոր չէ: Մյուս կողմից՝ իրավիճակը հիշեցնում է այն ֆուտբոլային թիմերին, որոնք իրենց միավորները վաստակել են, եւ այսպես ասած՝ վաստակածը ինքնին թույլ չի տալիս որեւէ մրցանակային տեղի հավակնել, բայց այդ հույսը կա, եթե մյուս թիմերը չկարողանան իրենց հերթին վաստակել իրենց հասանելիք միավորները: Այսինքն՝ ՀՀԿ հույսը մյուսների անհաջողությունն է կամ անարդյունավետությունը: Կկարողանա՞ն մյուս քաղաքական ուժերը,- հասկանալիորեն այդ թվում չէ հեղափոխության թիմը,- վաստակել իրենց հասանելիք միավորները եւ թույլ չտալ, որպեսզի Հանրապետականը իրենց անհաջողության հաշվին գրանցի սեփական հաջողությունը: Մյուս կողմից, սակայն, ՀՀԿ «անակնկալ» արդյունքը իր հերթին բավականին ուշագրավ խմորումներ է խթանելու այդ կուսակցությունում: Բանն այն է, որ այդ «անակնկալի» պտուղներն, այդուհանդերձ, քաղելու են խիստ սահմանափակ թվով ՀՀԿ-ականներ, եթե ՀՀԿ-ն անցնի խորհրդարան: Իսկ նկատի ունենալով այն, որ այդ ուժն այլեւս իշխանություն չէ, մանդատից բացի՝ այլ պտուղ ընտրությունը գործնականում չի տալու: Սրան զուգահեռ՝ ստացվելու է նաեւ, որ ընտրությանը մասնակցելու կողմնակիցները ճիշտ էին, չմասնակցելու կողմնակիցները՝ սխալ: Եվ քանի որ «պտուղները» քիչ են եւ քիչ են լինելու նաեւ հետագայում, ապա կուսակցության ներսում խթանվելու է խմորումների նոր փուլ եւ «անակնկալ հաջողությունը» կարող է նույնիսկ «մարսողական» խնդիրներ առաջացնել ՀՀԿ-ի ներսում: Համենայնդեպս, դեկտեմբերի 9-ի արդյունքը այդ միավորի ներսում, ըստ էության, սպասվում է ներքին հաշիվների պարզաբանման համար, պարզապես քաղաքացիներն են, փաստորեն, որոշելու, թե ՀՀԿ ներսում ով ում հաշիվները կմաքրի»: Առավել մանրամասն՝ թերթի այսօրվա համարում
Հետևեք մեզ Viber-ում
