Խոշոր ավտովթար Արմավիրի մարզում. բախվել են Toyota-ն, KIA-ն, Opel-ը. ավտոմեքենաները վերածվել են մետաղե ջարդոնի

Այսօր՝ նոյեմբերի 23-ին, խոշոր ավտովթար է տեղի ունեցել Արմավիրի մարզրում: Ժամը 16:20-ի սահմաններում Էջմիածին –Ոսկեհատ ավտոճանապարհի 1-ին կմ հատվածում բախվել են Opel մակնիշի 35 RZ 051 համարանիշի KIA մակնիշի 34 OR 026 համարանիշի և Toyota մակնիշի 35 CM 381 համարանիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 3 հոգի, որոնց առաջինը օգնության են հասել քաղաքացիներն ու Արտակարգ իրավիճակների նախարարության փրկարար ծառայության Վաղարշապատի հրշեջ-փրկարարական ջոկատի հրշեջ- փրկարարները՝ խմբի պետ Վարդան Մալխասյանի և ճանապարհային ոստիկանության 2-րդ սպայական գումարտակի 1-ին վաշտի 1-ին դասակի ծառայողները՝ վաշտի հրամանատար Վահան Էվինյանի, դասակի հրամանատար Կարեն Աբելյանի գլխավորությամբ, տեղափոխվել են հիվանդանոց: Դեպքի վայրում հավաքվածներն ասում էին, որ օպերատիվ են գործել Վաղարշապատի բժշկական կենտրոնի բժիշկները, ովքեր մինչև վիրավորներին հիվանդանոց տեղափոխելը, տեղում առաջին անհրաժեշտ բուժօգնություն են ցուցաբերել: Հրշեջ-փրկարարները հոսանքազրկել են ավտոմեքենաները, փակել գազաբալոններն ու սահմանազատել տարածքը: Ֆոտոլրագրողը հայտնում է, որ բախման հետևանքով ավտոմեքենաներից մեկի գազաբալոնը պոկվել ու շպրտվել է, իսկ մեկ այլ ավտոմեքենայի առջևի հատվածն էլ հայտնվել է Toyota-ի հետնամասի տակ: Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Դավիթ Գրիգորյանը տեղեկությունը փոխանցել է ոստիկանության Վաղարշապատի բաժին, որտեղից ժամանել է օպերատիվ խումբը՝ համայնքային բաժանմունքի տեսուչի գլխավորությամբ: Տեղում հետաքննչական աշխատանքները ղեկավարում է ՃՈ 2-րդ սպայական գումարտակի 1-ին վաշտի ավագ հետաքննիչ Գևորգ Եղիազարյանը, ում կողմից փաստի առթիվ նյութեր են նախապատրաստվում: Ոստիկանությունը պարզում է վարորդների և վիրավորների ինքնությունը: Քանի որ վթարի հետևանքով ճանապարահը մասամբ դարձել է դժվարանցանելի, դեպքի վայրում ուժեղացված ծառայություն են կատարում ՃՈ 2-րդ սպայական գումարտակի 1-ին վաշտի ավագ տեսուչ Մհեր Հակոբյանը, տեսուչներ Նարեկ Գրիգորյանն ու Եղիշե Եղյանը, որպեսզի հետաքրքրասեր վարորդները ավտոմեքենաները չկայանեն վթարի վայրում, խցանումներ տեղի չունենան, ինչը ՃՈ ծառայողներին հաջողվում է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: