«Զուռնա, դհոլ էլ ա ժողովուրդը նվագելու, քայլարշավ էլ եմ անելու, լոռեցիքի հետ հանդիպելու էլ եմ, երգելու էլ եմ, պարելու էլ եմ».Շարմազանով
ՀՀԿ խոսնակ, ԱԺ փոխնախագահ Էդուարդ Շարմազանովը՝ անդրադառնալով նոյեմբերի 24-ին Երևանում Նիկոլ Փաշինյանի հրավիրած քայլերթին,լրագրողների հետ զրույցում հայտարարեց. «Այս ամիսների ընթացքում ակնհայտ դարձավ, որ Փաշինյանի և նրա կառավարության անդամների մոտ ավելի լավ ստացվում է քայլելը և միտինգներ կազմակերպելը, քան տնտեսություն զարգացնելը, աշխատատեղեր ստեղծելն ու ներդրումներ բերելը : Ում մոտ ինչ լավ է ստացվում, դրանով պետք է զբաղվի:Հավանաբար, պարոն վարչապետը հասկացավ, որ իր մոտ տնտեսություն զարգացնելն ու երկիր կառավարելը վատ է ստացվում, կամ ընդհանրապես չի ստացվում և որոշեց զբաղվել իր հարազատ գործով՝ քայլերթ կազմակերպելով: Հուսով եմ՝ մի օր ինքը ամբողջությամբ կզբաղվի քայլերթեր կազմակերպելով, իսկ կառավարության գործը կտա ավելի պրոֆեսիոնալ գործիչներին»: Շարմազանովը քարոզարշավի ժամանակ չի խուսափելու ժողովրդի հետ շփումից: «Ամեն ինչ էլ անելու եմ: Զուռնա, դհոլ էլ ա ժողովուրդը նվագելու, քայլարշավ էլ եմ անելու, լոռեցիքի հետ հանդիպելու էլ եմ, երգելու էլ եմ, պարելու էլ եմ,- ասաց Է. Շարմազանովը՝ հավելելով, թե չի արտասանելու,- Մոտս լավ չի ստացվում»:
Հետևեք մեզ Viber-ում
