Այնպիսի հարաբերություններ, ինչպիսին իրենք սովոր են տեսնել,երբ մենք համակերպվողի դերում էինք,չի լինի.Փաշինյան

«Մարշալ Բաղրամյանն էլ Բելառուսի ազատագրման գործում շատ մեծ դերակատարում է ունեցել: Այնպես որ, այո, մեր բազմաթիվ հայրենակիցներ ոչ միայն Բելառուսի ազատագրմանը, այլեւ Հայրենական մեծ պատերազմին մեծ մասնակցություն են ունեցել:Ինչ վերաբերում է Բելառուսին. ես կարծում եմ, որ մեր միջազգային բոլոր գործընկերները պետք է մի բան արձանագրեն՝ այնպիսի հարաբերություններ, ինչպիսին իրենք սովոր են տեսնել, այդպիսի հարաբերություններ Հայաստանի հետ չեն լինելու, երբ մենք համակերպվողի դերում էինք: Ես Մարտունիում էլ ասացի՝ այնպիսի տպավորություն է, որ իներցիայով շատ-շատերն ուզում են, փորձում են, կամ պիտի փորձեն մեզ վերաբերվել որպես փոքր երկիր, փոքր ժողովուրդ: Ես պարզ ասում եմ՝ չի անցնելու, մենք մեծ ժողովուրդ ենք, մենք հազարամյա պատմություն ունեցող ժողովուրդ ենք, մշակույթի ժողովուրդ ենք, մենք գեներալների ժողովուրդ ենք, եւ էլի եմ ասում, մենք ապրիլ-մայիսին արել ենք մի բան, որ մարդկության պատմության մեջ նախադեպը չունի: Բայց այդ հարաբերություններում, համոզված եղեք, մեր ժողովուրդն ու կառավարությունը ի վիճակի են պաշտպանելու մեր երկրի շահերը, եւ սրա հետ պետք է բոլորը հաշվի նստեն եւ ես ձեզ խոստանում եմ՝ բոլորը հաշվի կնստեն»,-   Գեղարքունիքի մարզպետարանում այս մարզի համայնքապետերի հետ վարչապետի պաշտոնակատարի հանդիպման ժամանակ ,ի պատասխան մի քաղաքացու  մտահոգության,նման տեսակետ հայտնեց   վարչապետի պաշտոնակատարը: