«Չենք պատրաստվում մաս կազմել այդպիսի կառավարության, եթե նույնիսկ թախանձագին խնդրեն». Արմեն Ռուստամյան
«Այս պաթոսը լուրջ առավելություններ տալիս է կոնկրետ մեկ քաղաքական ուժի: Առավել սրել և ուղղորդել կարիքը չկա»: ԱԺ ճեպազրույցների ժամանակ նա հայտարարեց ԱԺ ՀՅԴ խմբակցության ղեկավար Արմեն Ռուստամյանը` անդրադառնալով առաջիկա ընտրություններում խախտումների հին մեթոդները կիրառելու փորձերին: Նրա խոսքով` ՀՅԴ-ն այլևս չպետք է մաս կազմի այնպիսի կոալիցիայի, որում որոշիչ ձայն չունի: ««Իմ քայլը» դաշինքն ունենալու է մեծամասնություն և ձևավորելու է դրանից բխած կառավարություն: Եթե այդպիսի վիճակ լինի, մենք չենք պատրաստվում մաս կազմել այդպիսի կառավարության, նույնիսկ եթե մեզ թախանձագին խնդրեն, ինչպես որ մինչև այսօր եղել է: Բայց մենք դրան չենք գնա: Մենք պետք է այնպես անենք, որ մեր անցած սխալները չկրկնենք... այս ամբողջ պրոցեսը շատ նմանեցնում եմ 90-ականների վիճակին. այն ժամանակ էլ այսպիսի նոր դեմքեր էին և բոլորին փոխեցին՝ իրենց վստահելիներին դրեցին, բայց մարդիկ եկան, որոնք նոր պիտի սովորեին ինչ է պետությունը և պետական կառավարությունը, ինչից էլ բխեցին բոլոր ձախողումները»,- ասաց Արմեն Ռուստամյանը: Պարոն Ռուսատամյանը նշեց, որ Աժ-ն էապես կտարբերվի նախորդներից, նոր դեմքեր կլինեն, բայց անորոշությունը շատ է, թե ինչ ուղիով կտանեն երկիրը: Նրա խոսքով՝ նախկին կանխորոշվածությունն էլ մի բան չէր, բայց հիմա կտրուկ փոփոխությունների հնարավորությունը մեծ է, բայց անորոշությունն էլ է շատ մեծ:
Հետևեք մեզ Viber-ում
