Մի հատ կողնորոշվեք, թե ձեր կուսակցությունը ընդդիմություն է, իշխանություն է, ի՞նչ կողմնորոշում ունի

ԱԺ փոխնախագահ, ՀՀԿ–ական Էդուարդ Շարմազանովը «Լուսավոր Հայաստան» կուսակցության նախընտրական ցուցակը գլխավորող Էդմոն Մարուքյանին հորդորում է կողմնորոշվել՝ իրենք ընդդիմություն են, թե իշխանություն։ «Էդմոն Մարուքյանին ասեք՝ մի հատ կողնորոշվեք, թե ձեր կուսակցությունը ընդդիմություն է, իշխանություն է, ի՞նչ կողմնորոշում ունի, նոր Հանրապետականի վրա խոսեք: Ընդդիմությանը հավակնող ուժը չի կարող ընդդիմության ընդդիմությունը լինի։ Եթե այդքան շատ եք գոհ այսօրվա կառավարությունից, գնացեք նրա հետ կոալիցիա կազմեք: Եթե քննադատում եք Հանրապետականին, հաստատ Փաշինյանի կեսի, կեսի, կեսի չափ չեք քննադատում: Ավելի լավ քննադատող Հանրապետականին, քան «Իմ քայլն» է, չկա, ուստի ուրիշի հարսանիքի սեղանին թամադայություն մի արեք»: Հարցին, թե ինչու ինքը չկա կուսակցության համամասնական ցուցակի առաջին 5–յակում, Շարմազանովը պատասխանեց. «Կուսակցությունն այդպես է որոշել, ես ցուցակի 6–րդն եմ, նախկինում եղել եմ 7-ը, ինչը, ենթադրում է, որ սա առաջընթաց է, ոչ թե հետընթաց»։ Ինչպես նշեց` եթե 2017թ.–ի խորհրդարանական ընտրությունների ժամանակ իրենց խնդիրն էր ստանալ 50 տոկոսից ավելի ձայն, ապա այսօր իրենց նպատակն է դառնալ երկրորդ քաղաքական ուժն «Իմ քայլը» դաշինքից հետո։ «Մենք չենք գնում՝ իշխանություն վերցնելու, մենք գնում ենք իրական ընդդիմություն լինելու։ Կարծում եմ՝ ՀՀԿ–ն կմտնի խորհրդարան։ Ձեր մեջ էլ կան մարդիկ, որոնք Հանրապետականին ձայն են տալու։ Դուք կարծում եք՝ Հայաստանում բոլորը կո՞ղմ են «Իմ քայլին»։ Դուք կարծում եք՝ Էդուարդ Շարմազանովը, Վիգեն Սարգսյանը ձայն չունե՞ն, ընտրող չեն ունենալո՞ւ»,– ասաց Շարմազանովը։