Մետրոպոլիտենի աշխատակիցներից գումարներ են պահվում.Դավիթ Խաժակյան

«Մշտապես բարձրաձայնել ենք մի խնդիր, որ փակ բաժնետիրական ընկերություններն օգտվում են Երևանի կողմից հատկացված բյուջեի զգալի մասից, բազմաթիվ ընթացակարգերով շատ ավելի պակաս թափանցիկ են, քան համայնքային բյուջեն է տնօրինվում: Բազմիցս բարձրաձայնել ենք, որ փակ բաժնետիրական ընկերություններում առկա են բազմաթիվ ռիսկեր, ուռճացված հաստիքացուցակներ, որոնք էլ ավելի մեծ բյուջե են պահանջում: Վերջերս մենք բողոքներ ստացանք մետրոպոլիտենից: Այդ տեղեկություններով՝ աշխատակիցներից յուրաքանչյուր ամիս աշխատավարձից պահվում է որոշակի գումար այսպես կոչված «Գթության ֆոնդին»: Այդ տոկոսները, որ վճարվում են, տնօրինվում են անհասկանալի կերպով, ոչ թափանցիկ: Մեր տեղկություններով՝ սա տեղի է ունենում Երևանի մետրոպոլիտենում, որին կցված է 6 ավտոմեքենա: Ընդհանուր առմամբ՝ 4000-4500 լիտր վառելիք է տրամադրվում դրանց, բայց մի մասն է շահագործվում, մյուս մասը մսխում են Երևանի բյուջեի կողմից տրված գումարները»,-  Երևանի ավագանու «Լույս» դաշինքի անդամ Դավիթ Խաժակյանն ավագանու նիստի ժամանակ՝ հարցուպատասխանի փուլում, խոսեց փակ բաժնետիրական ընկերությունների, մասնավորապես Երևանի մետրոպոլիտենի մասին: Անհրաժեշտություն կա վերանայելու փակ բաժնետիրական ընկերությունների գործառույթները,ասաց նա: «Բառացիորեն օրերս մենք քննարկումներ ենք ունեցել փակ բաժնետիրական ընկերությունների կարգավիճակի, բյուջետավորման, ֆինանսական հոսքերի և արդյունավետության խնդիրներով: Պլանավորում ենք թողնել այն ընկերությունները, որոնք տնտեսապես արդարացված բաժնետիրական գործունեություն են իրականացնում»,- պատասխանեց  Երևանի փոխքաղաքապետ Հայկ Սարգսյանը: