Եթե ձեր նախընտրական եռյակի առաջին տեղում լինի Նիկոլի ուսապարկը, 2-րդ՝Նիկոլի «դուխով» կեպկեն,Նիկոլի հազը՝ 3-րդ, մեկ է դուք 80 տոկոս ձայն եք հավաքելու. Աշոտյան

«Ես հասկանում եմ՝ դժվար է մարսել Հայաստանի պատմության մեջ առաջին նախադեպը, երբ նախորդ իշխանությունները ոչ թե ջախջախվում, տրոհվում են, ինչպես կոմունիստները, ՀՀՇ-ն, այլ փորձում են քաղաքական համակարգի կայացման ավանդույթներ դնել: Կարծում եմ՝ սա այն դեպքն է, երբ Հանրապետական կուսակցության մասնակցությունը ընտրություններին իրականում նպաստելու է ժողովրդավարության զարգացմանը երկրում», -ԱԺ հայտարարությունների ժամին հայտարարեց  ԱԺ Հանրապետական խմբակցության պատգամավոր, ՀՀԿ փոխնախագահ Արմեն Աշոտյանը: «Ռեյտինգային ընտրակարգով դնելու եմ  իր թեկնածությունը Երևանի թիվ 4 ընտրատարածքում, որն ընդգրկում է նաև իմ ծննդավայրը՝ Էրեբունի վարչական շրջանը: Հույս ունեմ, որ կլինեն մարդիկ, ովքեր կուզենան խորհրդարանում տեսնել քաղաքական գործիչների, որոնք ունեն գործադիր իշխանության, երկիրը ներկայացնելու փորձ, ինչպես նաև փորձ՝ այս իշխանությունների հետ աշխատելու», - ասաց Աշոտյանը: «Մեկը մյուսից ընտիր ելույթ են ունեցել, մեկն ասում է՝ մրցակից չունենք, ՀՀԿ-ն մեզ մրցակից չէ, մյուս փոխվարչապետն ասում է՝ մենք արդեն հաղթել ենք: Տղերք, նորից ասեմ՝ մի կրկնեք իմ ու Շարմազանովի սխալները, մի եղեք այդքան ինքնավստահ, որովհետև կործանումը սկսում է մեծամտությունից, գոռոզամտությունից: Մի արեք դա: Լավ է՝ մի բարեկիրթ նախարար գտնվեց՝ կրթության, գիտության նախարարը, որը ասաց, թե բոլորն են իրենց մրցակից: Ախր եթե գլուխ եք գովում Նիկոլի շուքի, ստվերի տակ, հիշեք՝ եթե ձեր նախընտրական եռյակի առաջին տեղում լինի Նիկոլի ուսապարկը, Նիկոլի «դուխով» կեպկեն՝ 2-րդ, Նիկոլի հազը՝ 3-րդ, դուք, մեկ է, 80 տոկոս ձայն եք հավաքելու: Իմ ռեյտինգային ընտրատարածքում թեկնածություն դնի ոչ թե ֆիզիկական անձ, այլ Նիկոլի սելֆիի ձողը, էլի առաջին տեղն է գրավելու: Էս նիկոլամանիայի պտուղները գտեք, քաղեք, բայց մի թափահարեք: Դուք գուցե ունեք լումա, բայց ոչ այնքան, որ այդ քաղաքական ժառանգությունը վերագրեք ձեզ», - անդրադառնալով փոխվարչապետի պաշտոնակատար ներ Արարատ Միրզոյանի և Տիգրան Ավինյանի հայտարարություններին ասաց  Աշոտյանը: