Արարատցիներին ուղարկել է կուսակցություն բացելու

ՀՀԿ-ի նախօրեին տեղի ունեցած նիստը, որի ընթացքում ԱԺ արտահերթ խորհրդարանական ընտրություններին մասնակցելու մասին որոշում է կայացվել, անցել է բուռն մթնոլորտում։ Անկաշկանդ բանավեճեր են ծավալվել շարքային կուսակցականների եւ Սերժ Սարգսյանի միջեւ։ Ամենաակտիվը եղել են ծնունդով արարատցիներ նախկին պատգամավոր Լեռնիկ Ալեքսանյանը, սփյուռքի փոխնախարար Ֆիրդուս Զաքարյանը եւ նախկին փոխնախարար Ռազմիկ Մարտիրոսյանը։ Նրանք դժգոհել են, որ կուսակցությունում այլակարծություններ չեն հանդուրժել եւ այսօր էլ չեն վերագնահատում կատարվածը, հետեւություններ չեն արվում եւ որոշումները ընդունվում են գրեթե միանձնյա։ Սերժ Սարգսյանի հետ նրանք բուռն բանավեճ են ունեցել, կուսակցության ղեկավարին հասցրել են զայրույթի այն աստիճանի, որ Սերժ Սարգսյանն առաջարկել է՝․«Դե այդքան դժգոհ եք, արարատցիներ  կուսակցություն գնացեք հիմնեք»։