Գառնիկը ճիշտ էր, Ասյան սխալվեց (տեսանյութ)
Երբ կապույտ և այլ գույնի մազերով հայտնի Ասյա Խաչատրյանը Երևանում պատմում էր Ղարաբաղում իր հետ տեղի ունեցածը, ակնհայտ էր, որ նրա խոսքում կար հայաստանցի-ղարաբաղցի հակադրության կոդ: Հարցն այն չէ, որ Ասյան սուտ բաներ էր պատմում Ղարաբաղի ոստիկանությունում իր հետ տեղի ունեցածի մասին: Ամենայն հավանականությամբ կապույտ մազավորը ճիշտ է ասել, բայց հարցն այն է, որ նա այդ ամենը պատմում էր հակաղարաբաղցիական տրամադրություններ առաջացնող ձևակերպումներով: Հակաղարաբաղցիականությունը և հայաստանցիների մոտ Ղարաբաղի հանդեպ հակակրանք առաջացնելու ցանկությունը, ինչպես ասում են, կարմիր թելով անցնում էր նրա խոսքերում: Այն օրերին ֆեյսբուքահայությունը բուռն ձևով արձագանքեց Ասյայի պատմածներին: Գրեթե բոլորը «ասուժդամս» էին անում Ղարաբաղի ոստիկաններին և «ադաբրյամս» էին անում Ասյային: Միայն քչերն էին արձանագրում, որ սույն աղջիկը էպատաժային բաներ է անում, որոնք այլ նպատակով են օգտագործվելու: Աղջիկն ամենայն հավանականությամբ կարող էր և չիմանալ իր արածների բուն նպատակը: Հայաստանում Ղարաբաղի ներկայացուցչության ղեկավար Գառնիկ Իսագուլյանն այն քչերից էր, ով այդ օրերին ասուլիս հրավիրեց և հայտարարեց, որ Ասյայի գործողություններում տեսնում է Բաքվի հետքն ու հետևաբար այդ աղջկա արածների և ասածների նպատակը լրիվ այլ է: Իսագուլյանի պնդում էր, որ ադրբեջանցիներն աշխատել են այդ աղջկա հետ, սակայն ցավոք ինքը այս պահին չի կարող ապացույցներ ներկայացնել, բայց հաստատ կարող է ասել, որ կա համապատասխան օպերատիվ ինֆորմացիա: Իսագուլյանին դատափետեցին, թե իբր նա ԿԳԲ-շնիկական հակաքարոզ է տանում խեղճ աղջկա դեմ և փորձում է Ղարաբաղի իշխանություններին պաշտպանել: Հայաստանում Ղարաբաղի ներկայացուցչության շենքի դիմաց նույնիսկ հավաք կազմակերպվեց՝ ի պաշտպանություն Ասյայի: Վերջին օրերին Ասյայի մասնակցությամբ տեղի ուենցած «ադրբեջանցի ընկեր» ակցիան եկավ ապացուցելու, որ, մոդայիկ դարձած ձևակերպմամբ, Գառնիկը ճիշտ էր, իսկ մյուսները սխալվեցին: Հայաստանում «խաղաղասիրական» քարոզը ոչ միայն բարձր կարգավիճակ ունեցող կանանց, այլ նաև «առաջադեմ» աչոնիկների միջոցով է տարվում: Առջևում Ղարաբաղի հարցով լրջագույն գործընթացներ են սպասվում և ադրբեջանցիներին սիրող ասյաները ակտիվորեն մեյդան են հանվել: Ասյաները կարող է չիմանան էլ, որ իրենք օգտագործվող քարոզչագործիքներ են, բայց դրանից նրանց «խաղաղասիրական» առաքելությունը նվազ մտահոգիչ չի դառնում: Հայկ Ուսունց 7or.am
Հետևեք մեզ Viber-ում
