Արագած Ախոյանը հերքում է

Այսօր մամուլում հրապարակում եղավ, որտեղ մասնավորապես նշվեց, որ  «Ազատ դեմոկրատներ», «Հանրապետություն» և «Ալյանս» կուսակցությունները առաջիկա խորհրդարանական ընտրություններին կարող են մասնակցել դաշինքով, և այս պահին կուսակցությունների ներկայացուցիչները բանակցում են այս հարցերի շուրջ: «Ալյանս» կուսակցության անդամ Արագած Ախոյանը մեզ հետ զրույցում հերքեց հրապարակված լուրը` ասելով, որ սուրճի սեղանի շուրջ չեն բանակցում: «Այո մենք հանդիպել ենք, բայց դա չի նշանակում, որ որևէ տեղ սուրճ խմելով ինչ-որ բան ենք պայմանավորվել։ Մենք միշտ էլ հանդիպում ենք, միշտ էլ քննարկում ենք: Առհասարակ, բանակցություններ ոչ թե ես եմ վարում այլ «Ալյանս» կուսակցության նախագահը: Ուզում եմ հիշեցնել, որ «Ալյանս» կուսակցությունը շարունակում է մնալ «Ծառուկյան» դաշինքի անդամ»,- եզրափակեց մեր զրուցակիցը: