Եկանք կանգնեցինք ներդրումային տաշտակի առջև. Շարմազանով

Վարչապետի ընտրության հարցի քննարկման ժամանակ Էդուարդ Շարմազանովն անդրադարձավ հեղափոխությունից հետո ՀՀ տնտեսական ցուցանիշներին, խոսեց արտաքին քաղաքականության մասին: «Ես հեռու եմ այն մտքից, որ վեց ամսվա ընթացքում մենք պետք է թռչեինք և ապրեինք դրախտում, բայց խոսեմ փաստերով: Ինչքան աշխատատեղեր է ստեղծվել, ներդրումային միջավայրն ինչպիսին է, ժողովրդի կենսամակարդակը լավացել է, թե վատացել, առաջին անհրաժեշտության ապրանքները թանկացել են, թե՞ էժանացել, մեր կյանքը լավացել է, թե՞ վատացել է»,- հռետորական հարցադրում արեց նա: Հեղափոխությունից հետո, ըստ նրա, ներդրումային բում էր սպասվում, բայց եկանք կանգնեցինք ներդրումային տաշտակի առջև: Այս տարվա բյուջեով 6.9 տոկոս տնտեսական աճ է գրված, իսկ հաջոդ տարվա բյուջեով 4.2 տոկոս է սպասվում: Ավելին, հաջորդ տարվա բյուջեի նախագծով 3.5 տոկոս գնաճ է նախատեսվում, զրո տոկոս աշխատավարձերի բարձրացում: Էդուարդ Շարմազանովն այնուհետ հայտարարեց. «Քանի որ սա, միգուցե, իմ վերջին ելույթն է այս գումարման ԱԺ-ում, ուզում եմ շնորհակալություն հայտնել բոլորին և ասել՝ իմ քննադատության հիմքում մի փնտրեք անձնական բան: Ամեն ինչ լավ է լինելու և չկա հին ու նոր Հայաստան, Հայաստանը մեկն է, որը գալիս է Հայկ նահապետից, որը հաղթել է Բելին ու գնում է հավերժություն, ու Հայկը երբեք չի կարող պարտվել Բելին»,- եզրափակեց Աժ փոխխոսնակը: