Նախազգուշացնող կրակոց, ինչ հետեւություն կարվի դրանից

Կես տարի է ինչ Նիկոլ Փաշինյանը վարչապետ է, սակայն նա մի սանտիմետր վեր չի բարձրացել ընդդիմադիր պատգամավորի իր հոգեվիճակից։ Ինչպես պատգամավական ելույթներն էին հախուռն ու անհավասարակշիռ, մի քանի անգամ ավել վարչապետականը։ Ազգային ժողովում իր վարչապետական ելույթը նա կառուցեց ճիշտ նույն տրամաբանությամբ, որով շարժվում էր այս ամիսների ընթացքում՝ կծեփեմ, կջարդեմ, պատերին կտամ, կփռեմ ասֆալտին եւ այսպես շարունակ։ Հենց ելույթի սկզբում Փաշինյանը ուլտիմատում դրեց՝ դեկտեմբերին արտահերթ ընտրություն լինելու է, եւ վերջ, ու սա այն պարագայում, երբ երկու օր առաջ նա չկարողացավ 63 աջակից գտնել ու տապալվեց ԸՕ նոր նախագիծը։ Նա հորդորեց ՀՀԿ-ին չխոչընդոտել այդ գործընթացը եւ ընդունել նոր ԸՕ-ն․«Հենց այդ ռեւանշիստական մղումները պահեցիք՝ ընտրությունները մենք ուզենք-չուզենք՝ լինելու է սեւ ու սպիտակի տրամաբանության մեջ ու դուք 0 ձայն եք ստանալու: Ձեր միակ շանսը հնարավորինս քաղաքականացնելն է, որ մենք խոսենք ծրագրերից, բյուջեից, պրոբլեմներից, տնտեսական հեռանկարներից, որտեղ դուք ունեք բավականին մեծ ինֆորմացիա ու կարող եք հանդես գալ, ի վերջո այդ ռեւանշիստական բաները թողեք, որովհետեւ դա ձեզ մենակ վնասում է, ի վերջո համակերպվեք, գոնե ընդդիմություն մնալու ձեր շանսը պահպանեք» նախազգուշացրեց նա: Փաշինյանը զարմացած է՝« Մեկը չկա՞, որ ձեզ բացատրի ձեր շահը» ։ Ապա անցավ շանտաժի․«Հին Ընտրական օրենսգրքով դուք ընդհանրապես չեք անցնելու: Ձեր միակ շանսը փոփոխված ԸՕ-ն է, պարզ համամասնական ընտրակարգը: Ինչքան լարվածությունը մեծ եղավ, այնքան ձեր դեմ է աշխատելու: Շարմազանովը հարցնում է՝ էդ բարիկադները մե՞նք ենք կառուցել, բա ո՞վ է կառուցել: Դուք եք կառուցել՝ ձեր կոռուպցիայով, ձեր անընդհատ դավադրություններով, ձեր անադեկվատ մեկնաբանություններով: Դո՛ւք եք կառուցել էդ բարիկադները ու բարիկադները մի բան են, որի վրա մենք այնքան վստահ ենք զգում, ուզում եք՝ կառուցեք, խնդիր չկա»: Փաշինյանը հենց ԱԺ դահլիճում փռեց նախընտրական բարիկադները։ Խոսելով Կապանի քաղաքապետի ընտրությունների մասին, նա ասաց, թե Կապանում հակահեղափոխությունն է հաղթել։ Նա մոռացավ մինչեւ անգամ երկու օր առաջ իր հայտարարություն, որ Կապանի ՔՊ թեկնածուի պարտությունը հեղափոխության հաղթանակն է. ««Իշխանությունը որևէ քայլ չի ձեռնարկել քաղաքացիների ընտրությունը որևէ կերպ իր ցանկությունների տրամաբանության մեջ դնելու համար։ Մենք դրա համար ենք հեղափոխություն արել և հեղափոխությունը հաղթել է»մ երկու օր առաջ լրագրողների հետ պաչծենում էր նա: Բայց ահա այսօր ԱԺ ելույթում նա այն միտքն էր առաջ տանում, թե՝ Կապանում հաղթել է հակահեղափոխությունը. «Հին ընտրական համակարգով ու մտածողությամբ քվեարկել է բացարձակ փոքրամասնությունը, որը, ցավոք, եղել է վճռական»: Փաշինյանի խոսքով՝ քրեաօլիգարխիկ ուժերը հանրությանը ուղղորդել են ընտրության ժամանակ, որի արդյունքում հաղթել է ոչ թե իրենց ներկայացրած թեկնածուն, այլ ուրիշ անձ: Ի դեպ, այս առթիվ արդեն դիտարկումներ եւ համեմատություններ կան, որ եթե մյուս քաղաքներում ընտրողների ցածր մասնակցություն է գրանցվել, ապա Կապանում հիսուն տոկոսից ավել ընտրող է քվեարկել, որտեղ էլ թաքնված է շան գլուխը։Այսինքն, եթե վաղը հասարակությունը ի վերջո թոթափի հետհեղափոխական էյֆորիան եւ ակտիվ մասնակցություն ցուցաբերի ընտրություններին՝ ընդդեմ Փաշինյանի, ապա վերջինս հայաստանյան հայության արդեն մեծամասնությանը կարող է համարել «հակահեղափոխականներ»։Ի դեպ, ՀՀԿ խմբակցության ղեկավար Վահրամ Բաղդասարյանը անդրադառնալով Նիկոլ Փաշինյանի ելույթի այն հատվածին, որ առանց Ընտրական օրենսգքրի փոփոխությունների, ՀՀԿ-ն քիչ շանսեր ունի ընտրվելու, պատասխանեց. «Ընտրական օրենսգրքի փոփոխությունը ընտրությունից մեկ ամիս առաջ բավական լուրջ խնդիր է, վատ է ազդում մեր հեղինակության վրա: Դա պետք է գիտակցեն բոլորը՝ ընտրություններից մեկ ամիս առաջ չի կարելի Ընտրական օրենսգիրք փոխել»: Դիտարկմանը, որ այդուհանդերձ ընտրական օրենսգրքի փոփոխությունը ՀՀԿ շահերից է բխում, ՀՀԿ խմբակցության ղեկավարը պատասխանեց. «Ես խնդրում եմ մի անձնավորեք, թե ում շահերից է բխում: Դեկտեմբերի ընտրություններն ո՞ւմ շահերից են բխում»: Այլ կերպ ասած՝ Բաղդասարյանը չբացեց ՀՀԿ-ի խաղաքարտերը՝ վախեցան արդյոք Փաշինյանի նախազգուշացումներից , թե պնդելու են իրենց տեսակետը։ Անի Սահակյան