«1999թ. հոկտեմբերի 27-ից մեկ ամիս անց այդ հարցը տվել եմ Ռոբերտ Քոչարյանին». Արամ Սարգսյան

«Այն բոլոր վարկածները, որ ժամանակին առաջ են քաշվել, ոչ մեկը չի հերքվել՝ առավել ևս ներսի ու դրսի պատվիրատուների վարկածը»,- այսօր Եռաբլուրում լրագրողների հետ զրույցում նշել է ԱԺ «Ելք» խմբակցության պատգամավոր, Վազգեն Սարգսյանի եղբայր Արամ Սարգսյանը:Արամ Սարգսյանի խոսքով՝ երկրին հասցված վնասի առումով Հոկտեմբերի 27-ն ու Մարտի 1-ը որոշակի նմանություն ունեն, բայց Մարտի 1-ի բացահայտման գործընթացը, ըստ նրա՝ անհամեմատ ավելի դյուրին է, քան Հոկտեմբերի 27-ինը։ ««Մարտի 1-ի բացահայտման գործընթացն անհամեմատ ավելի դյուրին է, և ես կարծում եմ՝ հոկտեմբերի 27-ը ճիշտ կլինի բացահայտել, երբ երկիրը կլինի ամուր հիմքերի վրա»,- շարունակել է Արամ Սարգսյանը: Անդրադառնալով այն հարցին, թե այսօրվա իշխանությունները կբացահայտե՞ն հոկտեմբերի 27-ի գործը, Արամ Սարգսյանըն ասել է. «Այն սրտացավությունը, որն այսօրվա իշխանությունները ցուցաբերում են մարտի 1-ի գործի բացահայտման համար, նաև իր մեջ զուգահեռներ ունի հոկտեմբերի 27-ի հետ: Կարծում եմ, երբ խաղաղ իրավիճակ լինի, այս իշխանությունները խնդիր կդնեն բացահայտելու: Դեռ 1999թ. հոկտեմբերի 27-ից մեկ ամիս անց այդ հարցը տվել եմ Ռոբերտ Քոչարյանին, ասել եմ՝ եթե կա արտաքին քաղաքական որևէ հանգամանք, որը խանգարում է գործը բացահայտելուն, ու դա կարող է պետությանը վնաս հասցնել, ասեք՝ ես իմանամ ու կողք կանգնեմ։ Ասաց՝ չկա ավելի կարևոր բան, քան այդ գործը բացահայտելը, կազմակերպիչներ չկան, այդ 5 հոգին են։ Ամբողջ դատավարությունն այդպես էլ գնաց՝ մնացած վարկածները չստուգելով ու չհերքելով»: