Մենք ջրի քաղաք ենք, Բաքուն էլ կրակի քաղաքն է, շարունակությունը չասեմ. Հայկ Մարության
Երևանի քաղաքապետ ՀայկՄարությանը Շահումյանի հրապարակում մասնակցեց մայրաքաղաքի 2800-ամյա հոբելյանին նվիրված հեծանվավազքին: «Արմենպրես»-ի հաղորդմամբ ` լրագրողների հետ ճեպազրույցում Մարությանն նշեց, որ ինքը և իր ընտանիքը հեծանվասպորտը շատ սիրում են և շատ վաղուց են զբաղվում այդ սպորտաձևով: «Ես հորդորում եմ բոլորին, որպեսզի ակտիվ զբաղվեն սպորտով: Հեծանիվը ոչ միայն սպորտ է, այլ փոխադրամիջոց, որի միջոցով կարելի է մաքուր պահել մեր սիրելի Երևանի փողոցներն ու նաև առողջ լինել, ինչու չէ, մի փոքր էլ բեռնաթափել փողոցները»,- ընդգծեց նա՝ հավելելով, որ ամեն ինչ անելու է, որ սպորտի այս տեսակը զարգանա: Եվս մեկ անգամ շնորհավորելով համայն հայությանը Երևանի տոնի կապակցությամբ, քաղաքապետը մաղթեց, որ Երևանը միայն գնա առաջ և մյուս 2800-տարիներն էլ ավելի պայծառ լինեն: «Երևանի 2800-ամյակի լավագույն նվերը համարում եմ Թավշյա հեղափոխությունը»,-նշեց Մարությանը՝ ընդգծելով, որ Երևանը պետք է լինի ջրի քաղաք: «Սա նաև սիմվոլիկ է: Եթե մենք ջրի քաղաք ենք, շատ լավ գիտենք, որ Բաքուն էլ կրակի քաղաքն է, շարունակությունը չասեմ»,- նշեց նա: Հեծանվասպորտի ֆեդերացիայի կողմից, տոնի առթիվ կազմակերպված հեծանվավազքը գլխավորելու համար, Երևանի քաղաքապետը պարգևատրվեց շնորհակալագրով:
Հետևեք մեզ Viber-ում
