Մակրոնն ու տիկինը հիացել են հայկական գինիով ու կոնյակով

«Ֆրանկոֆոնիայի միջազգային կազմակերպության գագաթնաժողովի ընթացքում մեր հյուրերին առանձնապես տպավորել էր հայկական գինին ու կոնյակը :Այն ինձ համար շատ կարևոր ու լավ նորություն էր, որովհետև ներկա էին երկրների ղեկավարներ, որոնք համարվում են գինեգործության համաշխարհային լիդերներ», - կառավարության նիստում ասաց ՀՀ վարչապետի պաշտոնակատար Նիկոլ Փաշինյանը: Նիկոլ Փաշինյանն ընդգծեց, որ իր համար, հատկապես, հաճելի էր, որ Ֆրանսիայի նախագահն ու առաջին տիկինը հարկ են համարել արտահայտվելու հայկական գինու ու կոնյակի՝ իրենց բառապաշարով «բրենդիի» որակի կապակցությամբ: «Եվ ոչ միայն նրանք, ընդհանուր առմամբ, մեր գինիներն ու կոնյկաները շատ լավ տպավորություն են գործել, ինչը նշանակում է՝ մենք կարողացել ենք հասնել գինու ու կոնյակի արտադրության միջազգային որոշակի ստանդարտի», - ասաց Նիկոլ Փաշինյանը: