Երկշաբաթյա ժամկետում վարչապետ չընտրվելու դեպքում 6-րդ գումարման Ազգային ժողովը կդադարի գործել

ՀՀ վարչապետ Նիկոլ Փաշինյանը հոկտեմբերի 16-ին՝ ժամը 20:00-ին Հանրային հեռուստաընկերության եթերում հայտարարեց վարչապետի պաշտոնից հրաժարական տալու մասին։ Ավելի վաղ՝ «Ելք» խմբակցության ներկայացուցիչների հետ հանդիպման ժամանակ, Նիկոլ Փաշինյանը չի բացառել, որ իր հրաժարականին հաջորդող 14 օրերի ընթացքում  Ազգային ժողովում վարչապետի ընտրության առնվազն առաջին շրջափուլում առաջադրվի իր թեկնածությունը՝ չընտրվելու կանխավարկածով: Հիշեցնենք, որ երկշաբաթյա ժամկետում վարչապետ չընտրվելու դեպքում 6-րդ գումարման Ազգային ժողովը կդադարի գործել՝ օրենքի ուժով։ Ինչպես այսօր տեղեկացրել էինք, ՀՀ կառավարության արտահերթ նիստում նա հայտարարել էր․ «Այսօր կարևոր օր է, և ՀՀ-ն թևակոխում է նոր և պատմական շրջափուլ, որի հիմնական իմաստը կարող ենք ձևակերպեել հետևյալ կերպ․ այս շրջափուլի արդյունքներով պետք է ավարտին հասցնենք գարնանը ՀՀ-ում տեղի ունեցած ոչ բռնի հեղափոխությունը, իսկ այդ մասին ես ավելի կոնկրետ հայտարարությամբ հանդես կգամ այսօր երեկոյան»։ Ավելի վաղ Փաշինյանը իր հրաժարականի մասին հայտնել էր «Ֆրանս 24» հեռուստաընկերության հետ հարցազրույցում․ «Ընտրությունները, նախնական կարող եմ ասել, որ մոտավորապես դեկտեմբերի 9-ին, 10-ին, այդ հատվածում, պլյուս-մինուս մի քանի օր, այդ հատվածում տեղի կունենան: Եվ սրա համար, ըստ էության, ես պետք է հրաժարական տամ մինչև հոկտեմբերի 16-ն ընկած ժամանակահատված»: