Չենք կարող 20 տարվա փչացրածը 20 օրում շտկել. Վանեցյանը՝ հայկական ֆուտբոլի մասին
Հայաստանի ֆուտբոլի ֆեդերացիայի նախագահ Արթուր Վանեցյանը ներկա գտնվեց հավաքականի մարզմանը, որից հետո պատասխանեց լրագրողների հարցերին: «Արմենպրես»-ի հաղորդմամբ՝ Վանեցյանը փաստեց, որ բաց մարզան ընթացում ֆուտբոլիստների հետ քննարկել է Ջիբրալթարի հետ խաղը և հետագա անելիքները: «Թեպետ պարտվեցինք Ջիբրալթարին, սակայն վիճակագրությանը նայելով սա վերջին շրջանի լավագույն խաղերից մեկն էր: Ամեն դեպքում պարտություն ունենք: Առաջիկայում կներկայացնենք երկարաժամկետ ծրագիր, որով կզարգացնենք մանկապատանեկան ֆուտբոլը»,-ասաց Վանեցյանը: ՀՖՖ նախագահի հույս հայտնեց, որ Մակեդոնիայի դեմ խաղում թիմը կկարողանա դրական արդյունքի հասնել: «Ամենակարևորն այն է լինելու, որ ֆուտբոլով հնարավորինս շատ զբաղվեն: Ես չեմ ուզում թերագնահատել այսօրվա հավաքականի ֆուտբոլիստներին, բայց եթե օբյեկտիվ լինենք, նայելով խաղը կասենք, որ չի բավարարում մեզ»,-փաստեց նա: Վանեցյանը շեշտեց, որ ծրագիրը երկարաժամկետ է և դրա առաջին պտուղները կքաղենք 4-5 տարի անց միայն: «Ես դիմում եմ երկրպագուներին՝ խնդրելով համբերատարությամբ լցվել և վստահեն մեզ: Առաջիկայում կտեսնենք գործուն քայլեր: Չենք կարող 20 տարվա փչացրածը 20 օրում շտկել»,-եզրափակեց ՀՖՖ նախագահը:
Հետևեք մեզ Viber-ում
