Նման որոշումը հղի է վտանգներով. Վահրամ Բաղդասարյան

Մենք որևէ քննարկում չունենք՝ դեկտեմբերին արտահերթ խորհրդարանական ընտրություններ անցկացնելու, որովհետև դա բավական վտանգավոր քայլ է:  ԱԺ ճեպազրույցների ժամին հայտարարեց ՀՀԿ խմբակցության ղեկավար Վահրամ Բաղդասարյանը: «Մեր խմբակցությունը դեկտեմբեր ամսվա համար որևէ բանակցություն և որոշում չի կայացրել: Մենք պատրաստ ենք, որ նորմալ բանակցային գործընթացով, բոլորի հետ համաձայնության արդյունքում քաղաքական ուժերին տրվի պատրաստվելու ժամանակ: Նիկոլ Փաշինյանը հոկտեմբերի երկուսին ասաց, որ դեկտեմբերին պետք է գնանք արտահերթ խորհրդարանական ընտրություններին, և դա վերջնական է: Ես ասացի, որ դեկտեմբերի համար ես պատասխանատվություն չեմ վերցնում, սակայն մայիս-հունիսին անցկացնելու համար վերցնում էի այդ պատասխանատվությունը: Նման որոշումը հղի է վտանգներով, ապագայում ԱԺ-ն կլինի միահեծան, և այս պարագայում, չեմ կարծում, խորհրդարանական և թռիչքաձև ժողովրդավար երկրում դա արդարացված կլինի: Այդ պարագայում չի կարող իրական ընդդիմություն ձևավորվել»,-ասաց նա: Վահրամ Բաղդասարյանն, անդրադառնալով քաղաքական ուժերի հայտարարություններին, մասնավորապես ՀՅԴ-ի, որ կոնսեսուսի դեպքում համաձայն են, իսկ «Ծառուկյան» դաշինքը կողմ է, ասաց, որ ինքը հետևում է միայն պաշտոնական հայտարարություններին: «Ես չեմ ցանկանում մեկնաբանել՝ քաղաքական ուժը ոնց է մտածում, ես հետևում եմ պաշտոնական հրապարակումներին, իսկ պաշտոնական հայտարարություն եղել է ՀՅԴ-ի կողմից, ապա նաև մեր՝ ՀՀԿ-ի կողմից, ոչ պաշտոնականն էլ Ծառուկյանի հայտարարությունն է»,-ասաց նա: Հարցին՝ եթե ժամկետների հետ կապված՝ վարչապետը որևէ զիջման չգնա, իրենց համար բանակցությունների թեման փակվա՞ծ է, Բաղդասարյանը նշեց ․«Մենք այդ հարցը բացարձակապես չենք քննարկել, մենք դեմ չենք բանակցություններին, բայց այն բանակցություններին, որի հիմքը դրել ենք, պետք է լինեն շարունակական»։ Բաղդասարյանի խոսքով՝ ճիշտ չէ այն դիրքորոշումը, որ եթե վարչապետ ես՝ քո տեսակետը դա է, ուրեմն դու ես ճիշտը։ Պետք է լինի բանակցային պրոցես, և ինքը շատ ուրախ է, որ վարչապետն այսօր հանդիպելու է Ծառուկյանի հետ։