Ադրբեջանցի ֆուտբոլիստը խնդրի առաջ է կանգնել՝ Փաշինյանի լուսանկարը հավանելու համար

Ադրբեջանի երիտասարդական հավաքականի ֆուտբոլիստ Ռենատ Դադաշովը հավանել է գերմանաբնակ հայ ռեփեր Լևոյի՝ ինստագրամյան էջում հրապարակված ՀՀ վարչապետ Նիկոլ Փաշինյանի լուսանկարը։ Այդ փաստը մեծ խուճապ է առաջացրել ադրբեջանցի հանրության շրջանում, և ֆուտբոլիստն ստիպված է եղել ներողություն խնդրել։ «Միանգամից ասեմ, որ ես Լևոյի հետ նույն դպրոցում եմ սովորել, ով էլ հրապարակել է հայ քաղաքական գործչի լուսանկարը։ Ես նույնիսկ չգիտեի, թե ով է նա։ Ես չհասկացա, թե ինչպես եմ հավանել այդ լուսանկարը։ Մեզ մոտ միջազգային դպրոց էր, որտեղ գերմանացիներից բացի սովորում էին թուրքեր, ռուսներ, հայեր և այլ ազգի ներկայացուցիչներ։ Մենք ընդհանուր ընկերներ ունեինք։ Գերմանիայում մենք այլ կերպ ենք մեծացել, մեզ չեն բաժանել ազգային հատկանիշով։ Այդ լուսանկարը մայիսին է հրապարակվել, և ես այսօր եմ տեսել այդ հավանումը։ Պատահաբար է ստացվել, ես դա չպետք է անեի։ Ինձ լավ հայտնի է այդ կոնֆլիկտի պատմությունը և ես ամեն ինչ շատ լավ հասկանում եմ։ Ափսոսում եմ այդ հավանման համար։Ես ադրբեջանցի եմ և հպարտ եմ դրա համար»,- նշել է նա։