Կրկին խորհրդարանը լուծարելու մասին

ՀՀ սահմանադրության 109.6 հոդվածի համաձայն ՀՀ 50+ հազար քաղաքացի ունեն օրենսդրական նախաձեռնության իրավունք: Ստորև տես սահմանադրության համապատասխան հոդվածը. ՛՛Հոդված 109. Օրենսդրական նախաձեռնությունը 6. Ընտրական իրավունք ունեցող առնվազն հիսուն հազար քաղաքացի ունի Ազգային ժողովին քաղաքացիական նախաձեռնության կարգով օրենքի նախագիծ առաջարկելու իրավունք:՛՛ Եթե Ազգային ժողովը մերժում է ներկայացված օրենսգծի ընդունումը (Տես ՀՀ սահմանադրության 204.1 հոդվածը), ապա 60 օրվա ընթացքում, եթե 1. օրենքի նախագծի ընդունմանը միանում են ևս 300 հազար քաղաքացի, 2. Սահմանադրական դատարանը նախագիծը ճանաչում է ՀՀ սահմանադրությանը համապատասխանող, նախագիծը դրվում է հանրաքվեի և, ըստ կարգի, ընդունվում կամ մերժվում: Ստորև տես սահմանադրության համապատասխան հոդվածը. ՛՛Հոդված 204. Քաղաքացիական նախաձեռնության կարգով ներկայացված օրենքի նախագծի վերաբերյալ հանրաքվեն 1. Եթե Ազգային ժողովը մերժում է Սահմանադրության 109-րդ հոդվածի 6-րդ մասով սահմանված կարգով ներկայացված օրենքի նախագծի ընդունումը, ապա մերժումից հետո` վաթսուն օրվա ընթացքում, օրենքի նախագծի ընդունման նախաձեռնությանը ընտրական իրավունք ունեցող ևս երեք հարյուր հազար քաղաքացու միանալու դեպքում նախագիծը դրվում է հանրաքվեի, եթե Սահմանադրական դատարանը նախագիծը ճանաչում է Սահմանադրությանը համապատասխանող: Քաղաքացիական նախաձեռնության մասնակիցների ստորագրությունների վավերականությունը հաստատում է Կենտրոնական ընտրական հանձնաժողովը:՛՛ Հիմա դիտարկենք հետևյալ ընթացքը: 50+ հազար ստորագրությամբ (դա կարելի է հավաքել մեկ օրում) ԱԺ ենք ներկայացնում օրենսգիծ (դա էլ կարելի է գրել երկու օրում), որով հանրաքվեին իրավունք է վերապահվում լուծարելու խորհրդարանը և հայտարարելու արտահերթ ընտրություններ: Ենթադրենք մեկ շաբաթվա ընթացքում այն մերժվում է ԱԺ կողմից: Ըստ վերոհիշյալ 204.1 հոդվածի այն փոխանցվում է Սահմանադրական դատարան՝ սահմանադրության համապատասխանությունը որոշելու համար և զուգահեռաբար հավաքվում է ևս 300 հազար ստորագրություն: Այդ օրեսգծի համար Սահմանադրական դատարանից դրական եզրակցություն ստանալը շատ ավելի դյուրին է և անվտանգ, քան երկու շաբաթ ԱԺ-ին պարտադրելը, որ նոր վարչապետ Փաշինյանի փոխարեն չընտրի որևէ այլ անձի: ՍԴ-ից դրական եզրակացություն ստանալուց հետո օրենքի նախագիծը դրվում է հանարքվեի: Հանրաքվեի միջոցով ԱԺ լուծարելու մասին օրենսգիծն ընդունվում է՝ դառնում օրենք, ապա այդ արդեն գործող նոր օրենքի հիման վրա՝ նոր հանրաքվեով, լուծարվում է խորհրդարանն ու հայտարավում է արտահերթ ընտրություններ: Իհարկե սա կտևի 5-6 ամիս, բայց այն անվտանգ է և ավելի իրականանալի՝ քանի որ շրջանցում ենք ԱԺ համաձայնության հարցը և ունենում ենք միայն ՍԴ եզրակացության պահանջ, ինչպես նաև երկիրը զերծ է մնում բախումներից ու ցնցումներից, քանի որ վարչապետի հրաժարականից հետք որևէ երաշխիք չկա, որ խորհրդարանը չի ընտրի նոր վարչապետ և միակ լուծումը կլինի, ինչպես ոմանք են ասում ՛՛գլուխ ջարդելու՛՛ մարտավարությունը: Ի՞նչ կասեք; Արա Պապյան, 4 հոկտեմբերի, 2018թ., ք. Երևան