Եվս մեկ հրաժարական

ՀՀ բնապահպանության նախարարության անտառային պետական կոմիտեի նախագահ Միքայել Մանուկյանը հրաժարականի դիմում է ներկայացրել: «Արմենպրես»-ի հետ զրույցում Անտառային կոմիտեի նախագահի օգնական, մամուլի գծով պատասխանատու Լուսինե Հակոբյանն ասաց, որ հրաժարականի դիմումը Միքայել Մանուկյանը ներկայացրել է հոկտեմբերի 3-ի առավոտյան: «Քանի որ ՀՅԴ-ն իր ներկայացուցիչներին հետ է կանչել ՀՀ կառավարությունից,  այդ տրամաբանության շրջանակներում էլ Միքայել Մանուկյանը հրաժարական է տվել»,-ասաց նա: Նա այդ պաշտոնին նշանակվել էր 2018 թվականի մարտի 15-ին։ Հայաստանի Հանրապետության նախագահ Արմեն Սարգսյանի ստորագրած հրամանագրերով հոկտեմբերի 2-ին  պաշտոնանկ են արվել կառավարությունում «Բարգավաճ Հայաստան» և ՀՅԴ կուսակցությունները ներկայացնող նախարարները։ ՀՀ նախագահի հրամանագրերով աշխատանքից ազատվել են ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը, ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը, ՀՀ տնտեսական զարգացման և ներդրումների նախարար Արծվիկ Մինասյանը, ՀՀ գյուղատնտեսության նախարար Արթուր Խաչատրյանը, ՀՀ արտակարգ իրավիճակների նախարար Հրաչյա Ռոստոմյանը, ՀՀ սպորտի և երիտասարդության հարցերի նախարար Լևոն Վահրադյանը։