Վրաստանում քաղաքացիական ակտիվիստ է սպանվել
«Ռուսթավի 2»-ը տեղեկացնում է ,որ Թբիլիսիի 25-ամյա բնակիչ Վիտալի Սապարովը մահացել է փողոցային արյունոտ կռվի հետեւանքով՝ Վրաստանի մայրաքաղաքի կենտրոնում: Սապարովը վիրավորվել է Դյումայի փողոցում տեղի ունեցած կռվում։ Երիտասարդին դանակի բազմաթիվ հարվածներից ստացած վերքերով տեղափոխել են հիվանդանոց, սակայն բժիշկները չեն կարողացել փրկել նրա կյանքը։ Կռվին մասնակցել է մի քանի մարդ։ Վեճը սկսվել է բարերից մեկում եւ շարունակվել փողոցում։ Մոտակա տների բնակիչներն ասում են, որ մոտավորապես առավոտյան 4-ին լսել են տղամարդկանց հայհոյանքներ։ Վիրավորվել է եւս մի հոգի՝ Սապարովի ընկերը։ Նա ծանր վիճակում գտնվում է հիվանդանոցում։ Վիտալի Սապարովն աշխատում էր «Ներառվածության եւ զարգացման կենտրոն» ոչ կառավարական կազմակերպությունում, որը զբաղվում է մարդու իրավունքների ոլորտում իրավիճակի լավացմամբ՝ կենտրոնանալով Եվրոպայում ռասիզմի, քսենոֆոբիայի եւ անհանդուրժողականության վրա։ «Ռուսթավի 2»-ը պնդում է, որ Սապարովի վրա հարձակման տարբերակներից մեկը հակասեմիտիզմն է։ Սապարովին դանակի հարվածներ հասցրած մարդուն ֆիքսել են տեսախցիկները, սակայն ոստիկանությունն առայժմ ոչ ոքի չի ձերբակալել։ ՆԳՆ-ն շարունակում է հետաքննությունը՝ «դիտավորյալ սպանություն» հոդվածով։
Հետևեք մեզ Viber-ում
