«Վայ այդ ճոճանակին...» ովքեր կլրացնեն «Սանա ծռերի» շարքը

Նոր լսում էի «Սանա ծռեր» համահայկական կուսակցության հիմնադիր համագումարի ելույթները, մասնավորապես կուսակցության նախաձեռնող խմբի անդամ և հիմնական գաղափարախոս Վարուժան Ավետիսյանի խոսքը, և հասկացա ավանդական ՀՅԴ-ի համար ծանր ժամանակներ են սպասվում, Երևանի քաղաքապետի ընտրություններին հավաքած խղճուկ ձայները միայն նախերգանքն էին, այս նոր կուսակցության ողջ գաղափարական հենքը Ռոստոմից եկող Դաշնակցության տեսլականներն են, և դրանց հնչեցնողների մարտական-հեղափոխական անցյալն ու ներկան իրենց շուրջ կհամախմբեն Քոչարյանի և Սերժ Սարգսյանի ժամանակների փոխզիջում հանդիսացող ՀՅԴ-ից հեռացող բազմաթիվ գործուն անդամների: «Այսպես կոչված երրորդ հանրապետության», իմա՝ ներկայիս անկախ ՀՀ-ի վախճանը գուժող և նոր՝ չորրորդ Կուր-Արաքսյան ընդլայնվող հանրապետության գալուստը կանխագծող «Սանա ծռեր»ը ձախ ազգայանական, հեղափոխական դաշտը ծածկելու ակներև ներուժ ունեն՝ հեղափոխականների առաջնորդ Նիկոլ Փաշինյանին մրցակից դառնալով: Ողջ խնդիրն այն է՝ Հայաստանի Հանրապետության աջ ազատական և ժողովրդավարական ուժերն այս ալիքին համընթաց կձավորվե՞ն, մարդու իրավունքների, ազատության և ժողովրդավարության իրական եվրոպական արժեքների կրողները կկարողանա՞ն լցնել քաղաքական դաշտի այս կարևորագույն հատվածը...Քաղաքականությունն արդյունավետ գործում է մաթեմատիկական ճոճանակի օրենքներով՝ աջից ձախ տատանումների ողջ տիրույթում, եթե կողմերից մեկն անգո է կամ պատնեշված, վայ այդ ճոճանակին, նրա տատանումները թերակատար են և տխեղծ.... Նարինե Դիլբարյանի գրառումը