Բաքվի կասկածելի խոստովանությունը Արցախի հարցում

ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) երեկ հայտարարություն են տարածել, որում նշել են, որ առանձին և համատեղ հանդիպումներ են ունեցել Հայաստանի և Ադրբեջանի արտգործնախարարներ Զոհրաբ Մնացականյանի և Էլմարդ Մամեդյարովի հետ՝ սեպտեմբերի 25-27-ը Նյու Յորքում՝ ՄԱԿ-ի Գլխավոր վեհաժողովի նստաշրջանի շրջանակում: «Երկու երկրների նախարարների հետ համանախագահները զրուցել են տարածաշրջանում տիրող իրավիճակի շուրջ և հստակություններ մտցրել վերջերս արված որոշ հայտարարությունների և մտահոգությունների տեղիք տվող միջադեպերի վերաբերյալ: Համանախագահները խորը ափսոսանք են հայտնել շարունակվող անհիմն մահվան դեպքերի վերաբերյալ: Նրանք նախարարներին զգուշացրել են լարվածության վտանգների մասին և կոչ են արել կողմերին կառուցողական կերպով ներգրավվել դրական մթնոլորտում և խուսափել սադրիչ հռետորաբանությունից: Համանախագահներն ընդգծել են, համապարփակ լուծումը կպահանջի փոխզիջումներ բոլոր կողմերից», ասվում է հայտարարությունում: Ապա` հայտարարությունում նշվում է, որ ԱԳ նախարարները հաստատել են բանակցային գործընթացն ակտիվացնելու ուղղությամբ քայլեր ձեռնարկելու և լարվածության թուլացմանն ուղղված լրացուցիչ քայլեր ձեռնարկելու կարևորությունը, և համաձայնել են ևս մեկ անգամ հանդիպել մինչև տարեվերջ: Համանախագահները ծրագրում են մոտ ապագայում այցելել տարածաշրջան և կզեկուցեն ԵԱՀԿ Մինսկի խմբին և Մշտական խորհրդին բանակցությունների ընթացքի մասին: Համանախագահների հայտարարությունը կարելի է ասել՝ կրկին բալասնավորված է, նշված չէ թե կոնկրետ ում է ուղղված զգուշացումը և կոչը՝ օրինակ` սադրիչ հռետորաբանությունից զերծ մնալու մասին: Իսկ սա նշանակում է, որ այն ուղղված է երկու կողմերին: Այս պայմաններում Հայաստանի ու Ադրբեջանի ԱԳ նախարարները, փաստորեն, պայմանավորվել են շարունակել երկխոսությունը, բայց որևէ խոսք չկա այն մասին, թե արդյո՞ք առաջիկայում կարող է կայանալ Փաշինյան-Ալիև հանդիպում: Նշանակում է անորոշությունը արցախյան բանակցային գործընթացում շարունակվում է պահպանվել, ինչը կանդրադառնա նաև սահմաններում լարվածության պահպանման վրա: Իսկ ահա Բաքուն, անմիջապես, մեկնաբանել է նյույորքյան հանդիպումը: «Հայաստանն ու Ադրբեջանը պայմանավորվել են հաջորդ ամիս շարունակել բանակցությունները Լեռնային Ղարաբաղի շուրջ ԵԱՀԿ Մինսկի խմբի միջնորդությամբ», Trend գործակալությանը հայտնել են Ադրբեջանի ԱԳՆ մամուլի ծառայությունից, հայտարարել է Ադրբեջանի արտգործնախարար Էլմար Մամեդյարովը՝ մեկնաբանելով Հայաստանի արտգործնախարար Զոհրաբ Մնացականյանի հետ հանդիպումը: «Ընդհանուր առմամբ բանակցությունները տևել են ավելի քան երեք ժամ: Տեղի է ունեցել հետաքրքիր և կարևոր մտքերի փոխանակում հակամարտության կարգավորման շարունակվող զարգացման շուրջ, և թե ինչ է անհրաժեշտ՝ տարածաշրջանում կայուն խաղաղություն ապահովելու համար: Մենք պայմանավորվել ենք շարունակել այդ բանակցությունները հաջորդ ամիս, այդ թվում կլինի համանախագահների այց տարածաշրջան»: Իսկ Ադրբեջանի նախագահի աշխատակազմի ներկայացուցիչ Հիքմեթ Գաջիևը արձագանքել է ՄԱԿ-ի Գլխավոր ասամբլեայում ՀՀ վարչապետ Նիկոլ Փաշինյանի՝ ԼՂ հակամարտության կարգավորման մասին հայտարարությանը: Նա նշել է, որ Հայաստանի վարչապետի հայտարարությունները կարող են պարալիզացնել բանակցային գործընթացը: Նա հավելել է, որ Հայաստանը պետք է իր զորքերը դուրս բերի Արցախից, դա պայման է, որի կատարման դեպքում միայն կարող է առաջընթաց լինել բանակցություններում և հնարավոր կլինի տարածաշրջանում խաղաղություն ու կայունություն հաստատել: Հայտնի է, որ արցախյան թեման քննարկվել է Նյու Յորքում նաև Մնացականյան-Լավրով հանդիպմանը: «Քննարկվել են երկկողմ և տարածաշրջանային օրակարգի մի շարք արդիական հարցեր: Հատուկ ուշադրություն է հատկացվել միջազգային ֆորումների շրջանակում հայ-ռուսական գործակցությանը»,- ասվում է Ռուսաստանի ԱԳՆ տարածած հաղորդագրության մեջ: Թամար Բագրատունի