Երևանում թալանել են կայանված վիճակում գտնվող Opel մակնիշի ավտոմեքենան. ՏԵՍԱՆՅՈՒԹ

Այսօր՝ սեպտեմբերի 28-ին, գողության դեպք է տեղի ունեցել Երևանում։ Ժամը 09։00-ի սահմաններում ոստիկանության Արաբկիրի բաժին ահազանգ է ստացվել, որ անհայտ անձը կամ անձինք Փափազյան փողոցում կայանված Opel մակնիշի FR 983 համարանիշի ավտոմեքենան թալանել են։ Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել ոստիկանության Արաբկիրի բաժնի օպերատիվ խումբը՝ քրեական հետախուզության բաժանմունքի տարածքը սպասարկող օպերլիազորի գլխավորությամբ։ Պարզվել է, որ կոտրել են ճանապարհի թույլատրելի հատվածում կայանված Opel մակնիշի ավտոմեքենայի ապակին և այնտեղից գողացել գազաբալոնն ու այլ իրեր։ Փաստի առթիվ ոստիկանության Արաբկիրի բաժնի հետաքննչական բաժանմունքում նյութեր են նախապատրաստվում։ Ոստիկանությունը ձեռնարկում է անհրաժեշտ օպերատիվ-հետախուզական միջոցառումներ՝ հանցագործությունը բացահայտելու ուղղությամբ։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: