Սանասարյանը հայտնեց աղբյուրները

«Առաջիկա 3 ամիսների ընթացքում մոտ 1,5 մլրդ դրամ կվերադարձվի պետբյուջե «Հայրենիք-Սփյուռք» և «Լուսանշան» ՊՈԱԿ-ներից»,- Պետական վերահսկողության ծառայության պետ Դավիթ Սանասարյանն այս մասին հայտնել է Կառավարության նիստից հետո՝ հավելելով, որ «Հայրենիք-Սփյուռք» ՊՈԱԿ-ից արդեն 48 մլն դրամ վերադարձվել է բյուջե: Նա ընդգծեց, որ հաջորդ շաբաթ վարչապետին կներկայացվեն նաև Ագրարային համալսարանի և Էջմիածնի քաղաքապետարանում արված ստուգումների արդյունքները: Մասնավորապես՝ պարզվել էր, որ ՀՀ սփյուռքի նախարարության «Հայրենիք-սփյուռք կենտրոն» պետական ոչ առևտրային կազմակերպության կողմից 2015թ. ընթացքում պետական բյուջեով հատկացված դրամաշնորհի շրջանակներում հայտարարված մրցույթում մերժվել է 21.244.200 ՀՀ դրամով ցածր գնային առաջարկ ներկայացրած ընկերության հայտը։ Փոխարենը՝ ծառայությունների մատուցման պայմանագրերը կնքվել են ավելի բարձր գին առաջարկած երկու այլ ընկերությունների հետ՝ պետությանը պատճառելով էական վնաս: