Կարինե Աճեմյան. «Ոչ մի դեպքում չենք համաձայնի գնալ հակասահմանադրական ճանապարհով»

«Հայոց աշխարհի» հարցերին պատասխանում է ԱԺ Հանրապետական խմբակցության անդամ Կարինե Աճեմյանը. -«Թավշյա հեղաշրջումից» հետո Փաշինյանն ասում էր, որ պետք է ժամանակ տալ քաղաքական ուժերին՝ պատրաստվելու եւ կազմ ու պատրաստ ներկայանալու արտահերթ ընտրություններին։ Այսօր, երբ իշխող կուսակցությունը 81-82 տոկոսանոց արդյունք է արձանագրել, եւ քաղաքական դաշտը, կարելի է ասել, ոչնչացված է, հայտարարում է, որ ստացել է ժողովրդի մանդատը՝ օր առաջ լուծարելու գործող խորհրդարանը եւ նոր ընտրություններ նշանակելու։ Ի՞նչ եք կարծում, ո՞րն է այս շտապողականության պատճառը։ -Ես դեռ մայիս ամսին եմ ասել, որ որեւէ քաղաքական ուժ երբեք իրավունք չունի ամբողջ ժողովրդի անունից խոսելու։ Հարյուր հազարավոր մարդիկ չեն մասնակցել այս ընտրություններին՝ հայտնելով իրենց անհամաձայնությունը իրականացվող քաղաքականությանը։ Մեր բազմաթիվ համախոհներ, որեւէ այլընտրանք չտեսնելով, ուղղակի չեն գնացել ընտրատեղամասեր եւ չեն քվեարկել որեւէ ուժի օգտին։ Այդ մարդիկ ժողովուրդ չե՞ն։ Արհամարհել նրանց կարծիքը կամ իրենց օգտին քվեարկած քաղաքացիներին վերագրել բոլորին, հայտարարել, որ ամբողջ ժողովուրդը իրենց հետ է, մեղմ ասած, անընդունելի է։ Ինչո՞ւ է շտապում. եթե վախենալու ոչինչ չունի՝ հանգիստ իր գործը պիտի անի։ Բայց վախենալու շատ բան կա. գնաճը սարսափելի տեմպերով աճում է, ներդրողներն իրենց պաշտպանված չեն զգում՝ ոչ միայն չեն ուզում նոր ներդրումներ անել, այլեւ հեռանում են երկրից, խնդիրները, մտահոգություններն օր օրի կուտակվում եւ խորանում են։ Մասնավորապես, կենսաթոշակային հիմնադրամների գումարները՝ կուտակային վճարները, արդեն երրորդ ամիսն է՝ չեն փոխանցվում։ Բազմաթիվ այսպիսի հարցեր կան, որոնց վարչապետը չի անդրադառնում, որովհետեւ ո՛չ տնտեսություն գիտի, ո՛չ ունի գործից հասկացող օգնականներ, որոնք կարող են պրոֆեսիոնալ մակարդակով զբաղվել այդ հարցերով։ Այս պարագայում, կարծում եմ, ինքը անհանգստանալու շատ բան ունի. եթե չունենար, չէր փորձի արհեստականորեն արագացնել իրադարձությունների ընթացքը։ Այսօր Ազգային ժողովը բնականոն աշխատում է, որեւէ կերպ չի խոչընդոտում կառավարության գործունեությանը, ե՛ւ դրսում, ե՛ւ ներսում իր բոլոր գործառույթները լիարժեք իրականացնում է։ Այստեղ որեւէ խնդիր չեմ տեսնում։ Միաժամանակ, ուզում եմ արձանագրել, որ մենք ոչ մի դեպքում չենք համաձայնի գնալ հակասահմանադրական ճանապարհով, օրենքներ խախտել՝ միայն նրա համար, որ Նիկոլ Փաշինյանն այդպես է ուզում, ունի ցանկություններ, եւ այդ ցանկությունները կապված են իր միապետական նկրտումների հետ։ -Մտահոգություններից մեկն էլ այն է, որ ԱԺ ղեկավար պաշտոնները դեռեւս ձեր ձեռքում են եւ հնարավորություն են ընձեռում ձեզ եվրոպական ատյաններում խոսելու Հայաստանում ստեղծված իրավական նիհիլիզմի, օրենքների եւ սահմանադրության նկատմամբ արհամարհական վերաբերմունքի մասին։ -Ուզում եմ հիշեցնել, որ մենք խորհրդարանական երկիր ենք, եւ սա 2017թ. լեգիտիմ ընտրությունների միջոցով ընտրված խորհրդարան է։ Եթե Փաշինյանը համարում է, որ գործող խորհրդարանը չի արտահայտում ժողովրդի կարծիքը, ես էլ կարող եմ համարել, որ ինքն էլ է ոչ լեգիտիմ, որովհետեւ հենց այս խորհրդարանի քվեով է դարձել վարչապետ։ Հարցազրույցն ամբողջությամբ՝ «Հայոց աշխարհ» օրաթերթի այսօրվա համարում