Նախագահի կին լինելը շատ մեծ պատասխանատվություն է․ Նունե Սարգսյան

17:22 - 24/սեպտեմբերի/2018

ՀՀ նախագահ Արմեն Սարգսյանի կինը՝ Նունե Սարգսյանը «TengrinewsTV»-ի զրույցում պատմել է, թե ինչ նշանակություն ունի իր համար լինել նախագահի կինը՝ նշելով, որ դա շատ մեծ պատասխանատվություն է․ «Նախագահի կին լինելը շատ մեծ պատասխանատվություն է, որովհետև այս դեպքում ես ներկայացնում եմ ամբողջ երկիրը, մեր մշակույթը, սկսած նրանից, թե ինչպես եմ հագնվում, ում հետ եմ հանդիպում և ինչ եմ խոսում մարդկանց հետ»,-ասել է առաջին տիկինը։

Նախագահի կինը պատմել է նաև, թե ինչպես է ծանոթացել ամուսնու հետ․ «Ես նրան գիտեմ 14 տարեկանից, մենք դպրոցական ընկերներ ենք։ Առաջին անգամ հանդիպել ենք, երբ ես 13 տարեկան էի, իսկ նա 14 և այս տարի նշում ենք մեր համատեղ կյանքի 40-րդ տարելիցը։

Դպրոցում նա գերազանցիկ էր, մտածում էի չեմ ընկերանա իր հետ, որովհետև նա գերազանցիկ է, բայց այնպես ստացվեց, որ ընկերացանք։ Հետո ընդունվեցինք Երևանի պետական համալսարան, մեր ընկերությունը շարունակվեց և հետո մենք ամուսնացանք»,-այս մասին զրույցի ժամանակ պատմել է Նունե Սարգսյանը։ Նա նշել է, որ նախագահը շատ ուժեղ տղամարդ է և լավ ամուսին․ «Նա շատ ուժեղ տղամարդ է, և շատ խելացի։ 1991 թվականին Բրիտանայում դարձավ Հայաստանի դեսպան, իսկ հետագայում նաև Վատիկանում, Բենելյուքսում և ուրիշ երկրներում»։ Հարցազրույցի ժամանակ առաջին տիկինը խոսել է նաև ընտանեկան ավանդույթների մասին՝ շեշտելով, որ բոլոր տոները նշում են․ «Ավանդույթները սկսվում են Ամանորից, բոլորը հավաքվում են մեր տանը և տոնում ենք Ծննդյան տոները։ Խոսում ենք միայն հայերեն լեզվով, որպեսզի երեխաները սովորեն, որ դա իրենց մայրենի լեզուն է։ Իմ հարսն ամերիկուհի է, բայց նա շատ է հարգում մեր մշակույթը, նա երեխաներին սովորեցնում է ազգային պարեր, հայերեն գրել, կարդալ, իհարկե նա դեռ հայերեն չի խոսում, բայց երեխաների հետ սովորում է»։