Բա հիմա նոր խորհրդարանական ընտրությունների ժամանա՞կն է, հենց այդ առիթից օգտվելով էլ Ադրբեջանը կմտնի ՀՀ տարածք․ Արտաշես Գեղամյան
«Դա Թավշյա հեղափոխություն չէր։ Դա դասական հեղաշրջում էր»,-Արտաշես Գեղամյանը կարծում է, որ Սերժ Սարգսյանի շնորհիվ է, որ հեղաշրջման ընթացքում ոչ ոքի արյունը չի թափվել․«Բարեբախտաբար մենք այն ժամանակ ունեինք խոշոր պետական գործիչ՝ ի դեմս Սերժ Սարգսյանի։ Մարդ, որը Ղարաբաղյան պատերազմով է անցել և թափված արյուն է տեսել, երբեք թույլ չէր, որ Երևանի փողոցներում արյուն թափվեր»։ «Հեղափոխություն իրականոցնողները Ազգային ժողովի նախագահի, տեղակալների, ԱԺ պատգամավորների և մի շարք այլ անձանց տների բակում հայհոյախառը և սպառնալիքներով լի պաստառներ էին փակցնում և այդքանից հետո ասում են, թե Թավշյա հեղափոխությու՞ն է եղել։ Այստեղ ոչ մի հեղափոխության մասին խոսք չի կարող գնալ»։ Գեղամյանի կարծիքով նոր կառավարությունը պատրաստ չէ երկիրը կառավարելու․«Հայաստանի նման բարդ աշխարհաքաղաքական դիրքում գտնվող պետության համար յուրահատուկ մոտեցումներ են պետք, բայց այս չորս ամիսների ընթացքում ես ոչ մի մշակված մոտեցումներ ու ծրագրեր չեմ տեսել նոր կառավարությունից»։ Կառավարության անդամների լավ ու վատ կողմերը Արտաշես Գեղամյանը դժվարացավ նշել․«Երբ ընդհանուր առմամբ ՀՀ կառավարության ծրագիրը շատ թերի է, նրանց գործունեությունը ոչ լիարժեք և դրական, ես առանձին ինչ-որ դրվագներ կամ անհատների լավ ու վատ կողմերը մատնանշել չեմ կարող»։ Գեղամյանի խոսքերով նոր կառավարության ճանապարհը տանում է փակուղի․«Թե նրանք այդ փակուղի տանող ճանապարհը կընտրեն քարքարոտ, թե՝ ասֆալտապատված, դա արդեն էական չէ։ Ասֆալտապատի միակ առավելությունը այն է, որ ճանապարհին ոտքդ քարին չի դիպչի»,-և հավելեց, որ այնուամենայնիվ կառավարությունը ցանկություն ունի և փորձում է լավ բաներ անել։ Նոր կառավարությունը ցանկանում է արտահերթ ԱԺ ընտրություններ իրականացնել, սակայն Գեղամյանը կարծում է, որ խորհրդարանը ցրելու կոչեր անողները ցանկանում են ժամանակ շահել սեփական անպտուղ աշխատանքները կոծկելու համար․«Արդյոք գեթ մեկ օրենսդրական նախաձեռնություն ներկայացվե՞լ է կառավարության կողմից, որ ԱԺ-ն հավանության չի արժանացրել։ Չի եղել այդպիսի դեպք»։ Գործչի պնդմամբ սահմանադրական և քաղաքական ոչ մի պատճառ չկա, որ ԱԺ-ն լուծարվի։ «Եթե նոր կառավարությունը գտնում է, որ խորհրդարանը պետք է լուծարվի, ապա վարչապետը իր լիազորությունները պետք է վայր դնի, և, եթե երկու անգամ չընտրվի նոր վարչապետ, նոր կարելի է լուծարել խորհրդարանը»։ Գեղամյանը վստահ է, թե՛ ԲՀԿ-ն, թե՛ ՀՅԴ-ն և ինչու ոչ ՀՀԿ-ն ունեն բավականին հմուտ կադրեր, ովքեր, եթե ԱԺ-ում ներկայացնեն իրենց տեսլականը Հայաստանի ապագային վերաբերող, ապա վերջինս համոզված է, որ բոլորը կասեն «բա մենք, եթե էսպիսի կադրեր ունենք, ինչի՞ Նիկոլ Փաշինյանին ընտրեցինք»․«Ինչքան էլ իշխանությունները փորձեն երկրում իրավիճակը ապակայունացնեն, միևնույն է հանգիստ իշխանափոխություն է լինելու։ Ուրիշ հարց է, որ ՀՀԿ-ն կամ ԲՀԿ-ն դրան չեն գնում, քանի որ հասկանում են՝ դրա ժամանակը չէ»։ Ադրբեջանը բացահայտ հայտարարում է, որ Հայաստանում վարվող քաղաքականությունը պատերազմ կբերի Ադրբեջանի հետ․«Բա հիմա նոր խորհրդարանական ընտրությունների ժամանա՞կն է։ Հենց այդ առիթից օգտվելով էլ Ադրբեջանը կմտնի ՀՀ տարածք։ Պետք է յուրաքանչյուր քայլ ձեռնարկելիս հաշվարկել հնարավոր վտանգները երկրիդ համար»։ armdaily.am
Հետևեք մեզ Viber-ում
