Սեպտեմբերի 21-ին Հանրապետության հրապարակում կլինի «սելֆիի ժամ»

Հանրապետության հրապարակում կայացած մամուլի ասուլիսի ժամանակ   մշակույթի նախարար Լիլիթ Մակունցը հայտարարեց այս տարի ինչպես ՀՀ անկախության օրվան նվիրված միջոցառումների «Դու անկախ ես» կարգախոսն է թելադրում, մեզանից յուրաքանչյուրն իրեն զգալու է անկախության կրողն ու պատասխանատուն։ Նախարարը հայտարարեց՝ միջոցառումը լինելու է ապակենտրոնացված ու բազմաժանր։ Մակունցը նաև տեղեկացրեց, որ թեև հիմնական միջոցառումները լինելու են Երևանի փոքր կենտրում, միևնույն է, մասնակցություն լինելու է նաև մարզերից։ «Ունենալու ենք մարզերից ներկայացված ծրագրեր։ Կունենանք հյուրեր Արցախից, ինչը մեզ համար շատ ուրախալի է։ Ելույթ են ունենալու բավականին մեծ թվով սիրված ու սիրելի երաժիշտներ։ Հանրապետության հրապարակում բացի երաժշտական կատարումներից, կլինեն նաև թատերական ներկայացումներ, արվեստի տարբեր ոճերին վերաբերող տաղավարներ: ՀՀ քաղաքացիներն այսօրվանից պետք է խանդավառված ու վարակված լինեն՝ անկախության ուրախությունն իրենց մեջ ունենալով։ Մշակույթի նախարարը նաև տարբեր ոլորտների հեղինակավոր ու գնահատված մարդկանց սեպտեմբերի 21-ին՝ ժամը 14։00-ին, հրավիրել է Հանրապետության հրապարակ՝ քաղաքացիների հետ զրուցելու ու նկարվելու  »,- ասաց նա։ «Նախատեսված է հատուկ ժամ Հանրապետության հրապարակում, որը պայմանականորեն անվանել ենք «սելֆիի ժամ»։ Այս ժամին քաղաքացիները կկարողանան նկարվել հայտնի գործիչների հետ»,- եզրափակեց Լիլիթ Մակունցը։