Ռուհանին քննարկելու է «Իրան-Պակիստան» գազատարի կառուցման հարցը

Իրանական IRNA-ի  փոխանցմամբ՝ Իրանի նախագահ Հասան Ռուհանին մարտի 25-26-ը կմեկնի Պակիստան և բանակցություններում հիմնական շեշտադրումն արվելու է «Իրան-Պակիստան» գազատարի կառուցման, ինչպես նաև դրա հզորության վրա, որը թույլ կտա համապատասխան ծավալի իրանական գազ արտահանել այդ երկիր։ Պակիստանյան այցի ժամանակ Ռուհանիին ուղեկցելու են երկրի կառավարության մի շարք անդամներ։ «Իրան-Պակիստան» գազատարի նախագիծը գնահատվում է մոտ 1.5 միլիարդ դոլար, դրանով Պակիստանը օրական կստանա 21.5 միլիոն խորանարդ մետր գազ։ Իրանն իր տարածքում ավարտել է խողովակաշարի կառուցումը՝ ավելի քան 900 կիլոմետր, և սպասում է խողովակաշարի պակիստանյան հատվածի կառուցման ավարտին։