Սասնա Ծռեր կուսակցությունը վրդովված է

Սասնա Ծռեր կուսակցության ստեղծման նախաձեռնող խումբն իր վրդովմունքն է հայտնում «Թալիշական ազգային շարժում» կազմակերպության նախագահ Ֆահրադդին Աբբոսզադեին (Աբբասով) Ռուսաստանի Դաշնությունում կալանավորելու և նրան Ադրբեջանին արտահանձնելու գործընթաց սկսելու վերաբերյալ: Ափսոսում ենք, որ Ֆահրադդին Աբբոսզադեն կեցության վայր է ընտրել Ռուսաստանը, ինչի շնորհիվ Ռուսաստանին հնարավորություն է տվել իրեն գերեվարելու և թշնամուն հանձնելու համար: Ռուս-թյուրքական գործակցության տարածքում ապրող ժողովուրդների համար վաղուց պետք է ակնհայտ լիներ, որ Ռուսաստանի տեսակետից նրանք մանրադրամ են, ուստի ի դեմս Ռուսաստանի արբիտր կամ, առավել ևս՝ հովանավոր փնտրելու բոլոր դեպքերն ունենալու են ողբերգական հետևանքներ: Տեղի ունեցածը ևս մեկ անգամ հիշեցնում է մեզ, որ Հայաստանը՝ որպես այդ տարածքում գտնվող ամենամեծ ներուժով օժտված գործոն, պարտավոր է ստանձնել մյուս կեղեքված ժողովուրդների, այդ թվում և առաջին հերթին՝ ռուս-թուրք գործարքով ստեղծված Ադրբեջան անունով արհեստական պետության մեջ ապրողների, ազատագրական պայքարին ամեն կերպով աջակցողի առաքելությունը: Տվյալ դեպքում՝ Հայաստանն առնվազն պարտավոր է հստակ վերաբերմունք արտահայտել Թալիշ ժողովրդի ազատագրական պայքարի առաջնորդին գերեվարելու և Ադրբեջանին հանձնելու երևույթի վերաբերյալ, ինչպես նաև իր ձեռքից եկածն անել նրան ադրբեջանական բանտից փրկելու ուղղությամբ: Հայաստանը պետք է շտապի և մեծ ջանք գործադրի, որովհետև Ադրբեջանին արտահանձնելու դեպքում Ֆահրադդին Աբբոսզադեի կյանքին ռեալ վտանգ է սպառնում: Սասնա Ծռեր կուսակցության ստեղծման նախաձեռնող խումբը զորակցում է Թալիշ ժողովրդին ու «Թալիշական ազգային շարժում» կազմակերպության նախագահ Ֆահրադդին Աբբոսզադեին և համոզմունք է հայտնում, որ մոտ ապագայում համատեղ ջանքերով վերջ կտրվի արհեստական պետություն Ադրբեջանի գոյությանը, իսկ նրա տարածքում ապրող կեղեքված բնիկ ժողովուրդները ձեռք կբերեն ինքնորոշվելու և ազգային պետականություն ունենալու հնարավորություն: