«Ասել ենք՝ հրահանգներ չենք տալու դատավորներին».Փաշինյան
Վարչապետ Նիկոլ Փաշինյանը Փարիզի «Գաբրիել» սրահում հանդիպում է ունեցել Ֆրանսիայի մայրաքաղաքի հայ համայնքի բազմաթիվ ներկայացուցիչների հետ և պատասխանել նրանց մի շարք հարցերի: Ներկաները վարչապետից հետաքրքրվել են Ֆրանսիայի նախագահ Էմանուել Մակրոնի հետ բանակցությունների արդյունքներից: Ի պատասխան` Նիկոլ Փաշինյանը նշել է. «Այսօրվա հանդիպման ամենակարևոր արձանագրումը և արդունքը հետևյալն է. կարող ենք համարել, որ առաջիկայում Հայաստանի Հանրապետությունն ավելի լուրջ և մեծ միջազգային դերակատարում պետք է ունենա: Հեղափոխությունից հետո Հայաստանի միջազգային հեղինակությունն աճել է ու կարող ենք ավելի ակտիվ դերակատարում ունենալ միջազգային հարաբերություններում»: Կառավարության ղեկավարը տեղեկացրել է, որ բացի երկկողմ հարաբերություններից` Ֆրանսիայի նախագահի հետ քննարկել են նաև միջազգային նշանակության տարբեր հարցեր: Նիկոլ Փաշինյանը հավելել է, որ կիսատ մնացած հարցերը Ֆրանսիայի գործընկերոջ հետ կքննարկի Երևանում, երբ Էմանուել Մակրոնը պետական այցով կժամանի Հայաստան: «Վստահ եմ, որ նախագահ Մակրոնի հետ մեր շփումները և հարաբերությունները գնալով ավելի ինտենսիվ են դառնալու»,- ասել է վարչապետը: «Երրորդ հանրապետությունում դատական համակարգը ամենակոռումպացվածներից է եղել:Ես վարչապետի պաշտոնը ստանձնելով՝ ասել եմ, որ պետք է հրաժարվեմ դատավորներին Բաղրամյան 26-ից հրահանգ իջեցնել… Դատավորներն իրենք չեն համակերպվում այդ ամենին: Մենք ասում ենք՝ ոչ հրահանգներ չենք տալու, բայց թույլ էլ չենք տա հրահանգներ ստանաք այն տեղերից, որտեղից ստացել եք ձեր գործունեության ողջ ընթացքում: Ես ասել եմ, որ փոփոխությունները հավուր պատշաճի կգնահատվեն դատական համակարգի կողմից, ու մեր դատական համակարգը ի վերջո կօգտվի ընձեռված հնարավորությունից, որ ինքը կարող է լինել կատարյալ անկախ»,-ասել է Նիկոլ Փաշինյանը:
Հետևեք մեզ Viber-ում
