Եթե կալանքը տան, Քոչարյանը կսկսի գրել. ինչ են պարզել փաստաբանները
«Պարոն Քոչարյանն այդ ձայնագրման հետ նույնքան առնչություն ունի, որքան այստեղ նստած յուրաքանչյուր անձ: Այն տարբերությամբ , որ գաղտնալսման բովանդակությունը նրան է ամբողջությամբ վերաբերում»: Այսօր լրագրողների հետ հանդիպման ժամանակ ասաց երկրորդ նախագահի փաստաբան Հայկ Ալումյանը՝ անդրադառնալով ԱԺ-ում պատգամավոր Ալեն Սիմոնյանի այն հայտարարությանը, ըստ որի՝ ԱԱԾ տնօրենին և ՀՔԾ պետին գաղտնալսել և ձայնագրել է Ռոբերտ Քոչարյանը: «Ռոբերտ Քոչարյանի պաշտպանների կողմից մանրակրկիտ ուսումնասիրվել են ինչպես հեռախոսային խոսակցություններ պարունակող նյութը, այնպես էլ այդ նյութի հետ առնչություն ունեցող բարձրաստիճան պաշտոնատար անձանց մեկնաբանությունները: Կատարված ուսումնասիրությունները մեզ այժմ հիմք են տալիս պնդելու, որ քրեական գործի քննության, ներառյալ Ռոբերտ Քոչարյանի կալանավորման ընթացքում թույլ են տրվել նրա իրավունքների և հիմնարար ազատությունների կոպիտ խախտումներ»,- ասաց փաստաբանը: Ալումյանի խոսքով՝ հատկանշական է ԱԱԾ տնօրենի արհարամարհական վերաբերմունքն առաջին ատյանի դատարանի դատավորի հանդեպ: Ըստ Ալումյանի՝ խոսակցությունների բովանդակությունից նաև պարզ է դառնում, որ ԱԱԾ տնօրենն անձի կալանավորման վերաբերյալ ուղղակի ցուցում է տվել առաջին ատյանի դատարանի դատավորին: Նրա խոսքով՝ ուշադրության է արժանի նաև խոսակցության այն հատվածը, երբ ՀՔԾ պետը ԱԱԾ պետին ասում է, որ նա գնա ու խոսի վարչապետի հետ: Փաստաբանի խոսքով՝ սա փաստում է, որ վարչապետը ևս մասնակից է եղել այս գործով խափանման միջոցի հարց քննարկմանը: Խոսակցությունների բովանդակությունից նաև պարզ է դառնում, որ կալանավորման կիրառումը դառնում է ոչ թե օրիանական նպատակով, այլ այն նպատակով, որ անձին ստիպեն ցուցմունք տալ ինքն իր կամ գործով անցնող մեկ այլ անձի դեմ: Այդ մասին է վկայում ՀՔԾ պետի այն արտահայտությունը, թե եթե կալանքը տան, Քոչարյանը կսկսի գրել: Լրագրողներից մեկը նկատեց՝ « վախեցած դատավոր» արտահայտությունը հնչում է թե գաղտնալսված հեռախոսազրույցում, թե Քոչարյանի հարցազրույցում. արդյոք դա պատահականություն է: «Ես նիստին ներկա եմ եղել, էթիկապես չեմ կարող ինձ թույլ տալ օգտագործել «վախեցած» բառը, բայց որոշակի անհանգստություն կար: չեմ ուզում ավել գնահատակն տալ՝ վախեցած էր, թե՝ չէ: Դա այն բառը չէ, որ 2 տարբեր տեղերում ինչ-որ խնդիր առաջացնի: Դա պարզապես զուգադիպություն է, կապ չի կարող լինել: Մտքեր հնչեցին, որ ոչ միայն Ռոբերտ Քոչարյանն է գաղտնալսել, այլև իր փաստաբաններն են գաղտնալսել և տարածել: Ուղղակի շատ կարճ ասեմ, որ դա իրականությանը չի համապատասխանում:Անհեթեթությունները հետագա մեկնաբանման ենթակա չեն »,- ասաց Քոչարյանի փաստաբաններից մյուսը՝ Արամ Օրբելյանը:
Հետևեք մեզ Viber-ում
