Ապացուցվեց՝ հրահանգավորված քրեական հետապնդում է. Խաչատուրովի փաստաբանը պատրաստվում է հարցը քննարկման թեմա դարձնել նաև միջազգային ատյաններում

Մարտի 1-ի գործով մեղադրյալ, ՀԱՊԿ գլխավոր քարտուղար Յուրի Խաչատուրովի փաստաբան Միհրան Պողոսյանը հրապարակված սկանդալային ձայնագրությունից եզրակացրել է՝ ԱԱԾ տնօրեն Արթուր Վանեցյանը և ՀՔԾ պետ Սասուն Խաչատրյանը միջամտում են Հայաստանում արդարադատության իրականացմանը։ Aysor.am-ի թղթակցի հետ զրույցում Պողոսյանը նկատեց, որ հրապարակված ձայնագրությունից էլ պարզ է դարձել, որ Խաչատուրովի նկատմամբ խափանման միջոց կիրառելու հիմքեր չեն եղել։ «Մենք ի սկզբանե հայտարարում էինք, որ Խաչատուրովի նկատմամբ քրեական հետապնդումը ապօրինի է, և այս ձայնագրությունը, ապացույց է, որ նրա նկատմամբ քրեական հետապնդումը ապօրինի է ու չի տեղավորվում քրեական դատավարության օրենսդրության շրջանակներում։ Անձին «թող մի երկու օր նստի, խելքը գլուխը կգա» արտահայտությամբ կալանավորման ներկայացնելը ծայրահեղ ապօրինություն է, որը անհետևանք կարծում ենք, չի մնա», -ասաց Միհրան Պողոսյանը։ Նա ասաց, թե հետևում է իրավապահ երկու մարմինների ղեկավարների ասուլիսին և փորձում հասկանալ նրանց արդարացումներ։ Սակայն, նրա խոսքով, տպավորությունն այն է, որ «փորձ է կատարվում շեղել իրենց կողմից կատարված ապօրինությունից հանրության ուշադրությունը»։ Հարցին, թե արդյոք պատրաստվո՞ւմ է հրապարակումների առնչությամբ իրավական գործընթաց սկսել, փաստաբանը պատասխանեց, որ հարցը պետք է նախ քննարկի իր պաշտպանյալի հետ և հետո կսպասեն՝ երկրի բարձրաստիճան ղեկավարության կողմից հնչեցվող գնահատականներին։ «Մենք այս հարցը քննարկման առարկա ենք դարձնելու ինչպես Հայաստանի Հանրապետությունում, այնպես էլ միջազգային ատյաններում, քանի որ կոնկրետ հրահանգավորված քրեական հետապնդում է իրականացվում կոնկրետ իմ պաշտպանյալի նկատմամբ։ Կարծում եմ, եթե Հայաստանը հռչակվել է որպես իրավական պետություն, ապա պետք է շահագրգռված լինի, որ տվյալ գործողությունները, հայտարարությունները իրավական գնահատականի արժանանան։ Սակայն հաշվի առնելով, որ մեզ մոտ շատ քիչ բան է փոխվել, ապա քրեական գործ հարուցվելու է ոչ թե անձանց գործողություններին գնահատական տալու հետ կապված, այլ քրեական գործ ահրուցվելու է տվյալ խոսակցությունը հանրայնացնելու հետ կապված։ Արդյոք մենք այդ տիպի պետությունում էինք ցանկանում ապրել, ինչի համար ես ինքս անձամբ փողոցներ էինք փակում», -ասաց փաստաբան Պողոսյանը։ Նշենք, որ այսօր «Youtube» տեսահոսթինգում այսօր հրապարակվեց ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցը, որտեղ իրավապահ մարմինների բարձրաստիճան պաշտոնյաները խոսում են մարտի 1-ի քրեական գործով անցնող մեղադրյալների, անելիքների վերաբերյալ։