Կհագնեմ կամուֆլյաժս ու կարգուկանոն կհաստատեմ. հեսա ձեզ էնպես յութուբում կտեղադրեմ, կզարմանաք

ՀՀ վարչապետ Նիկոլ Փաշինյանը այսօրվա քարոզարշավի ժամանակ, խոսելով այսօրվա թիվ 1 քննարկման թեմա դարձած գաղտնալսումների ու գաղտնալսող անձանց վախերի մասին, հայտարարեց, որ բոլոր նրանք, ովքեր իրենց  հանդուրժողականությունը շփոթում են թուլության հետ, հենց այսօր կզգան ժողովրդի ու իրենց հուժկու հակահարվածը: «ՀՀ-ում մի 10-20, քարը տրաքի 200, 300, լավ 500 հոգի կան, որ դուրս են մեր մտածելակերպից, մնացած ամբողջ հայ ժողովուրդը ժպտում է, միասնական է եւ հայ ժողովուրդը շարունակելու է ժպտալ ու հաղթել, հայ ժողովրդի դեմ խաղ չկա: Մեր երկրում սպիտակները հաղթել են եւ սեւերի պարտությունն անշրջելի է, սեւերը ջախջախված են ու այլեւս ոտքի չեն կանգնելու: Հիշու՞մ եք իմ ասուլիսը, երբ ես նշեցի, որ կոռուպցիայի հետ դժվար թե կարողանամ կոմպրոմիսի գնալ: Մարդիկ մտածում են՝ կայքեր ունեն, յութուբներ ունեն, ֆեյքեր ունեն, ու ամեն ինչ կարող են, իմացեք, ձեր դեմ ես չեմ պայքարում, ձեր դեմ էս ժողովուրդն է պայքարում, մենք պայքարում ենք հանուն ճշմարտության եւ օրինականության եւ այդ ամենի տերը ժողովուրդն է, ՀՀ քաղաքացին...»: