Ով կլինի հաջորդը, ում կգաղտնալսեն. Վանեցյանը մանրամասնում է

ԱԱԾ տնօրեն Արթուր Վանեցյանը նշեց, թե երկու կառույց կա` ՀՔԾ-ն և ԱԱԾ-ն, որոնք վերջին շրջանում ստանձնել են դեր` արմատախիլ անել այս երկրում անօրինականությունը: «Մենք այս կարճ ժամանակահատվածում այնքան գործ ենք արել, որ վերջին 10-20 տարվա ընթացքում իրավապահները չեն իրականացրել, սրանք պարզապես խոսքեր չեն, ես դա կարող եմ ապացուցել թվերով»,- ասաց նա: Լրագրողները հետաքրքրվեցին` արդյոք սա հիմք չէ, որ նա հրաժարական ներկայացնի, ինչին Վանեցյանը պատասխանեց, որ ինքը կառչած չէ իր պաշտոնից, սակայն նշեց. «Որ վայրկյանին հասարակությունը նման պահանջ կներկայացնի, ես այդ հրաժարականը կտամ, կամ հասարակությունը, կամ հանրապետության քաղաքական ղեկավարությունը որ վայրկյանին նման պահանջ ներկայացնեն, ես հրաժարական կտամ: Ես կառչած չեմ այս պաշտոնից, բայց այս ձայնագրության տարածման հիմնական նպատակը այն է, որ թուլացնեն մեզ` ԱԱԾ-ին, ՀՔԾ-ին, որպեսզի այն գործը, որ մենք սկսել ենք, թողնենք կիսատ: Հարց կառաջանա` ուրիշ մարդիկ չկա՞ն, կան, անփոխարինելի մարդիկ չկան, բայց մենք ենք սկսել, տեղյակ ենք մանրամասներին, ունենք այնքան կամք ու վճռականություն, որ այն հասցնենք ավարտին»,- նշեց Վանեցյանը: Արթուր Վանեցյանի խոսքերով՝ իր ու ՀՔԾ պետի մասնակցությամբ ձայնագրության տարածումը հիմնականում նպատակ ունի թուլացնել իրենց. «Որ այն գործը, որը սկսել ենք՝ թողնենք կիսատ, անփոխարինելի մարդիկ չկան, բայց մենք ենք այս գործը սկսել ու ունենք կամք, որ գործը հասցնենք ավարտին»,-նշեց ԱԱԾ տնօրենը: Նա նաև ասաց, որ եթե իրեն և ՀՔԾ պետին գաղտնալսում են, ապա հնարավոր է գաղտնալսեն բոլորին, այդ թվում նաև վարչապետին, պաշտպանության նախարարին: