«Ժառանգության» թիրախը
Երևանի քաղաքապետի «Ժառանգություն» կուսակցության թեկնածու Ռաֆֆի Հովհաննիսյանը սեպտեմբերի 10-ին կայացած նախընտրական քարոզարշավի մեկնարկին նվիրված միջոցառման ժամանակ հայտարարել է, որ նախընտրական քարոզարշավից և սեպտեմբերի 23-ին նախանշված Երևանի ավագանու ընտրություններից հետո իշխանութունը կանցնի ժողովրդին, և որ «Ժառանգություն» կուսակցությունը հուսով է, որ Երևանի բնակչությունն իր կողքին կլինի։ «Եթե ես, որպես քաղաքապետի թեկնածու, երևանցիների մեծամասնության վստահությանն արժանանամ, պատիվ կհամարեմ դառնալ մայրաքաղաքի հասարակական ծառայողներից մեկը, որը պաշտոնում գտնվելու ամբողջ ժամանակահատվածում ավագանու հետ միասին որոշումներ կկայացնի՝ ելնելով բացառապես Երևանի բնակիչների, շահագրգիռ կողմերի ու մասնագետների դիրքորոշումից», - վստահեցրել է քաղաքական գործիչը։ Նա նշել է,որ երևանցիները պետք է որոշեն, թե որ թիմն է ի վիճակի կատարել իր խոստոմները ներդրումների, բյուջեի ավելացման, Հայաստանի ու սփյուռքի ներուժի միավորման վերաբերյալ՝ ի շահ մայրաքաղաքի: «Ժառանգություն» կուսակցության անդամ Սոնա Մալխասյանն իր հերթին հայտարարել է, որ իրենց թիմը պայքարելու է այն բանի համար, որ Երևանը խելացի դառնա ու տեխնոլոգիապես բարձր լինի։ «Կուսակցությունը մտադիր է կրկնապատկել Երևանում կանաչ տարածքներն ու Հայաստանի մայրաքաղաքը վերածել Արևմուտքի Սիլիկոնային հովտի։ Երևանը պետք է դառնա փոքր ու միջին բիզնեսի քաղաք, որտեղ զարգանում են էկոլոգիապես մաքուր, բարձր տեխնոլոգիական արտադրությունը, արևային էներգետիկան, թափոնների վերամշակումը», - նշել է նա։ «Ժառանգություն» կուսակցության ավագանու թեկնածու Արմեն Մարտիրոսյանն էլ հայտարարեց, որ «Ժառանգությունը» ոչ միայն առանձնահատուկ ծրագրային մոտեցումներ ունի, այլ նաեւ առանձնահատուկ հետագիծ: Մարտիրոսյանը, խոսելով իրենց կուսակցության նախընտրական ծրագրի մասին, շեշտեց, որ «Ժառանգությունը» միակ կուսակցությունն է Հայաստանում, որ հանդիսանում է Եվրոպայի իշխող՝ ժողովրդական կուսակցության անդամ. «Մենք գիտենք այդ ֆոնդերի տեղը, այդ անձանց գիտենք, այդ գործիքակազմը կա, որով կարող ենք բազմաթիվ գրանտային ծրագրեր բերել Երեւանի զարգացման համար: Ժառանգությունը բերելու է ցածր տոկոսադրույքներով բազմաթիվ վարկեր: Որպես ՏԻՄ մարմին մենք այդ լիազորություններն ունենք»,- ասաց Արմեն Մարտիրոսյանը: Արմեն Մարտիրոսյանը նշեց, որ այս պահին իրենց սեղանին դրված է 1 միլիարդ դոլարի աշխատանք պահանջող ծրագիր, որը պետք է իրագործվի համատեղ ջանքերով. «Մենք երկարաժամկետ ծրագրերի կողմնակից ենք: «Ժառագությունն» ապահովելու է, որ չլինի կուսակցականացված կառավարում, այլ ընդհանուր: Մենք հնարավորություն ունենք բոլոր տեսակի խնդիրները քայլ առ քայլ լուծել: Մեր թիրախն է լինելու տրանսպորտային համակարգը: Մետրոյի նվազագույնը մի կայարան պետք է կառուցվի «Ժառանգության»՝ Երեւանի կառավարման ընթացքում: Ավելին կկարողանանք՝ ավելի լավ, բայց որոշ կայարաններում պարտադիր են ալտերնատիվ մուտքերը: Մեր ծրագրային կետերը շատ են, հիմա ներկայացնելու ժամանակը՝ քիչ»,- ասաց Արմեն Մարտիրոսյանը:
Հետևեք մեզ Viber-ում
