Ոլորտում իրականացվող քաղաքականությունն արդյունավետ չէ

Տնտեսական զարգացման և ներդրումների նախարար Արծվիկ Մինասյանը խորհրդարանում լրագրողների հետ զրույցում անդրադարձել է հարցին, թե ինչո՞ւ որոշվեց փակել գործարար Ռուբեն Վարդանյանի համահեղինակած Ռազմավարական նախաձեռնությունների կենտրոնը: Ինչպես ասաց՝ ունենք կրկնօրինակում և ոլորտում իրականացվող քաղաքականությունն արդյունավետ չէ: Ռազմավարական նախաձեռնությունների կենտրոնի հիմնական նպատակը, ըստ նախարարի, այն էր, որ այն մեծ հաշվով պետք էր դիտարկել ամբողջ կառավարության գործառույթի ներքո: «Եթե ուշադիր եք եղել, թե ինչ լիազորություններով է օժտված, այդ թվում՝ ստրատեգիական ուղղվածության հետազոտություններ իրականացնելու և առաջարկներ ներկայացնելու, սա վերապահված է մի շարք գերատեսչությունների: Բացի դա, պետություն-մասնավոր համագործակցության օրենքի նախագծով մենք առաջարկել ենք մի այնպիսի միավորի ստեղծումը, որը հենց պետական ստրատեգիական ծրագրերի մասով, ինչպես նաև ոլորտային այն ծրագրերով, որտեղ պետությունը պետք է մասնակցություն ունենա, այս միավորն ըստ էության պետք է իրականացնի այդ գործառույթների մի մասը: Դրանք նախկինում իրականացվում էին Ռազմավարական նախաձեռնությունների կենտրոնի կողմից: Այնպես չէ, որ այն ամենը, ինչ նախկինում ստեղծված է, լիկվիդացվում է: Հիմնական նպատակն արդյունավետությունն է»,- նշեց Արծվիկ Մինասյանը