Սա գործարար հանդիպում է, ոչ թե հանրահավաք. Ռուբեն Վարդանյանը՝ Փաշինյանին

Ռուսաստանաբնակ հայ գործարար Ռուբեն Վարդանյանը ՀՀ վարչապետ Նիկոլ Փաշինյանի և Ռուսաստանի հայ գործարարների հետ հանդիպման ժամանակ դիմել է վարչապետին` նշելով, որ դա գործարար հանդիպում է, ոչ թե հանրահավաք, ուստի կարելի է խոսել թվերից: «Բիզնեսը սիրում է կայունություն, կանխատեսելիություն և հանգստություն»,-ասել է նա և հետաքրքրվել է, թե արդյոք այս ամենը կա հիմա Հայաստանում, քանի որ նախկին իշխանություններն էլ էին կոչ անում գալ և ներդրումներ անել ՀՀ-ում: Նիկոլ Փաշինյանը նախ համաձայնել է, որ ՀՀ տնտեսության մեջ կան շատ անհամապատասխան կետեր, տարբեր բանաձևեր անհասկանալի են. «Տեղի է ունեցել հեղափոխություն, այդ ընթացքում Հայաստանի կայունությունը ոչ մի րոպե չի խաթարվել: Հիմա անընդհատ տարբեր մարդիկ խոսում են անկայունության, քաղաքացիական պատերազմի մասին. այդ ինչի՞ մասին է խոսքը, որևէ մեկը կարո՞ղ է բացատրել: Այսօր ՀՀ-ում իշխանությունը պատկանում է ժողովրդին ու միշտ է պատկանելու, ուզում եք՝ ինձ ցմահ միապե՞տ հայտարարեմ, որ ասեք` կայունություն կա»։