Մի կապեք իմ նախկին քննադատությունների հետ․ Արմեն Դուլյանը նոր հաղորդում կվարի

Նոր եթերաշրջանից Առաջին ալիքի եթերում կլինի բանավեճի ֆորմատով՝ «Խաղի կանոններ» քաղաքական հաղորդումը, որը կվարի հայտնի հեռուստամեկնաբան և լրագրող Արմեն Դուլյանը։ Նախկինում ֆեյսբուքյան տիրույթում  Արմեն Դուլյանն աչքի էր ընկնում Հանրային հեռուտաընկերության գործելաոճին ուղղված քննադատություններով։   «Դա կապ չունի իմ քննադատելու հետ, որովհետև ես մոտավորապես 10 տարի առաջ բոլորովին ուրիշ իշխանությունների օրոք նաև աշխատել եմ այնտեղ, որևէ խնդիր չեմ տեսնում: Պարզապես հրավեր ստացա և ընդունեցի այդ հրավերը: Հրավերը եղել է ղեկավարության կողմից: Զանգեցին և առաջարկեցին վարել քաղաքական հաղորդում: Քանի որ դրա փորձն ունեմ, համաձայնվեցի: Այս հաղորդումը պետք չէ կապել իմ քննադատությունների հետ: Այս հաղորդման նպատակն է ցույց տալ, որ կա այսպիսի կարծիք և հակառակ կարծիք՝ դրանով նպաստելով խոսքի ազատությանը, բազմազանությանը և այլն. ես ուրիշ նպատակ չեմ դնում»-ArmDaily.am-ի հետ զրույցում նշեց Արմեն Դուլյանը։ Դուլյանի կարծիքով՝ անկախ նրանից, թե լրագրողը որ հեռուստաընկերությունում է աշխատում,կարևորը լրագրողական սկզբունքները պահպանելն է։  «Ես աշխատել եմ ամենատարբեր հեռուստատեսություններում՝ «Շանթ» հեռուստատեսությունում, 9 տարի առաջ աշխատել եմ Հանրային հեռուստաընկերությունում, հետո աշխատել եմ «Կենտրոն» հեռուստաընկերությունում, հիմա նորից վերադարձել եմ Հանրային: Որևէ խնդիր ես չեմ տեսնում, որովհետև, լինելով տարբեր հեռուստատեսություններում և վարելով այնտեղ հաղորդումներ, ես բոլորովին չեմ փոխել իմ լրագրողական սկզբունքները»-ընդգծում է նա։ Նա հավաստիացնում է՝ այդ սկզբունքները տարիների ընթացքում չեն փոխվել։ «Դրանք լիովին մնացել են նույնը, ինչ որ եղել էր, երբ որ ես աշխատում էի «Ազատություն» ռադիոկայանում, ռուսաստանյան ռադիոյում և այլն: Ես գտնում եմ, որ ցանկացած պրոֆեսիոնալ լրագրող պետք է այդպես վարվի: Այսինքն՝ որտեղ էլ աշխատելիս լինի,նա ուղղակի պետք է պահպանի ինչ-որ սկզբունքներ: Ես դրանք ունեցել եմ և 30, և 20, և 10 տարի առաջ, և բոլորովին այդ սկզբունքներից շեղում չի եղել մինչն օրս»- ասաց Արմեն Դուլյանը։